-Almmuhus-
-Almmuhus-
-Almmuhus-
OĐĐASATNorggas vudjet 140 000 olbmo gárrenvuođas juohke beaivvi

Norggas vudjet 140 000 olbmo gárrenvuođas juohke beaivvi

-

-

Vaikko Geaidnopolitiijat lohket ahte norgalaččain leat buoremus guottut gárrenvuođas vuodjimii, de leat goit ge 140 000 olbmo geat vudjet gárrenvuođas. 14 000 sis leat alkoholagárrenvuođas.

Muhtumat ostet alkomehtera, mainna isket lea go áin promilla. NAF ja Geaidnopolitiijat eai ávžžut dan dahkat. Alkomehterat sáhttet váldit fokusa eret das mii lea dehálaš; namalassii leat go skihkalaš biilavuoddji. Dan dieđiha NAF preassadieđáhusas.

– Lea njuolgut várálaš geavahit alkomehtariid mat čájehit boastut. Jus lea unna boasttuvuođaš, de das sáhttet stuora váikkuhusat. Mii diehtit ahte jus vuodjá biillain go lea 0,2 promilla, de lassána riska 400-500 proseanttain, lohká NAF fágahoavda Morten Fransrud.

 

Lohpi vuovdit alkomehteriid mat eai čájet riekta

Alkomehteriid oažžu oastit rámbuvrrain, ja dávjá ostet priváhtaolbmot daid, vai besset iskat sáhttet go biillain vuodjit maŋŋel go leat juhkan alkohola, dahje beaivvi maŋŋel.

Eai gávdno lágas nannejuvvon njuolggadusat alkomehteriidda maid vuvdet priváhta olbmuide. Danne maid lea lohpi vuovdit alkomehteriid mat eai mihtit riekta.

 

Beare oallugat vudjet gárrenvuođas

– Go 14 000 vudjet vaikko lea promilla, de čájeha ahte leat áin beare oallugat geat vudjet gárrenvuođas. Stuorámus oassi dain leat sii geat dávjá vudjet gárrenvuođas, muhto leat maid olusat geat vuoddjájit beare árrat beaivvi maŋŋel go leat juhkan alkohola, lohká Geaidnopolitiijaid hoavda Runas Karlsen.

Politiijabálvá Grethe Clausen lea logi jagi bargan Geaidnopolitiijan, ja son ii ávžžut luohttit alkomehtarii.

Son deattuha ahte lea makkár forbma olbmos lea mii ferte mearridit ábuha go vuodjit biillain. Son lasiha vel ahte ii ábut vuodjit jus lea váibbas.

– Eai min ge alkomehterat dohkke duođaštussan, dat dušše čujuhit. Mii geavahit varrageahččalemiid duođaštussan, lohká Clausen.

 

Promillavuodjin lassánan

Promillavuodjin lassánii 44 proseanttain 2015:s 2016 rádjái. 2016:s lassánedje maid jápminlihkohisvuođat johtolagas 15 proseanttain.

Geaidnopolitiijaid mihttu lea ahte ii okta ge galgga jápmit johtolagas, ja oassin eastadanbarggus lea doallat promilla dárkkistemiid.

– Okta jápminlihkohisvuohta, lea okta beare olu, lohká Geaidnopolitiijaid hoavda.

-Almmuhus-