Norgga olmmošlohku lassánii vuosttaš kvartálas 15 300 olbmuin. Norggas leat de vuosttaš gearddi badjel 5,5 miljovnna ássi.
Álbmotlassáneapmi lea stuorámus vuosttaš kvartálas 2012 rájes. Ja dat dáhpáhuvvá vaikko leat historjjálaš unnán riegádahttimat.
– Vaikko šattolašvuohta njiedjá ain, de olmmošlohku aŋkke lassána. Vuosttaš kvartálas olaheimmet 5,5 miljovnna, earret eará danin go Ukraina stáhtalahtut lassánedje, dadjá Statistihkalaš guovddášdoaimmahaga ráđđeaddi Magnus Haug.
Netto sisafárren, namalassii sisafárremat minus olggosfárremat, lei alimus vuosttaš kvartálas dan rájes go SGD álggii almmuhit dákkár loguid 1997:s.
