Norga ii beasa geiget várrečohka skeaŋkan ránnjáriikii, ja geige baicce bácci ja ruhtadoarjaga Norgga-Suoma kulturfondii.
Norga ii beasa geiget várrečohka skeaŋkan ránnjáriikii, ja geige baicce bácci ja ruhtadoarjaga Norgga-Suoma kulturfondii.
Geassemánu 1. beaivvi ávvuda Suopma 100 jagi iešmearrideaddjin sierra riikan.
Várri lei galgat leat skeaŋkan Suoma 100 jagi iešmearridanávvudeapmái, muhto árvalus ii šaddan duohtan, ja Norga lea gávdnan eará skeaŋkkaid ránnjái dál go dollejit Supmii doaluide.
– Mii sávvat lihku min Suoma olbmáide ja ránnjáide ávvudemiin, muitala olgoriikaministtar Børge Brende NTB:i.
Norga háliida nannet ovttasbarggu
Norgga skeaŋka Supmii lea bázzi masa lea juolluduvvon 750 000 ruvnno hábmemii. Bázzi galgá ceggejuvvot Hanasullo ođđa kulturguovddáža olggobeallái Helssegis. Ruoŧŧa skeŋke maid bácci mii galgá biddjot kulturguovddážii.
Lassin bázzái, de addá Norga guokte miljovnna ruvnno mainna nanne Norgga-Suoma kulturfoandda.
– Nannen lea signála ahte mii háliidit lagat ovttasbarggu Suomain, erenoamážit giella- ja kulturáššiin, muitala kulturministtar Linda Hofstad Helleland NTB:i.
Gonagasbárra leaba maid fárus doaluin, ja gonagas sárdnida beaivemállásiin.
