Maŋŋel go Norggas mearriduvvui 2018:s galle oahppi eanemusat sáhttet leat juohke oahpaheaddji nammii, de leat lassánan 2500 ođđa oahpaheaddjejahkebarggu Norgga vuođđoskuvllaide.
Oahpaheaddjenorbma lea árvvoštallojuvvon ja čájehuvvo ahte eanas skuvllat čuvvot oahpaheaddjenorpma. Ohppiidlohku lea unnon juohke oahpaheaddji nammii, erenoamážit 1.-4. luohkáin.
– Oahpaheaddjit geain lea gelbbolašvuohta ja dilli oaidnit buot ohppiid, lea deháleamos mánáid ja nuoraid oahppamii, hálddašeapmái ja loaktimii. Dan rájes go álggaheimmet oahpaheaddjenorpma 2018:s, leat skuvllain ožžon olu gelbbolaš oahpaheddjiid. Oahpaheaddjit vásihit sis lea eanet dilli juohke oahppái, ja sáhttet eambbo heivehit oahpahusa. Eambbo oahpaheaddjit lea maid čoavddus eanet praktihkalaš bargui skuvllain, dadjá máhttoministtar Tonje Brenna (Bb) preassadieđáhusas.
88 proseantta olahan
NIFU dat lea árvvoštallan norpma Máhttodepartemeantta ovddas. Dutkit leat earret eará gávnnahan ahte 88 proseantta skuvllain ollašuhttet dan meari, ja leat unnit oahppit juohke oahpaheaddjái dábálaš oahpaheamis, earenoamážit 1.-4. luohkáin.
Dan 12 proseanttas mat eai olahan norpma, leat eanas skuvllat stuora báikkiin, ja ollu dain skuvllain leat measta nagodan mihtu.
Eai leamaš váikkuhusat
Oahpaheaddjenorbma ii leat buktán skuvllaide eambbo oahpaheddjiid geain ii leat oahpaheaddjeoahppu, ii ge leat unnidan eará bargosurggiin bargiid. Boaittobealde eai ge leat massán oahpaheddjiid gávpogiidda. Norbma ii ge oro váikkuhan ohppiid našunála geahččalemiid bohtosiidda.
Eai internašunála, eai ge našunála dutkamat, leat čájehan ahte oahpaheaddjelohku váikkuha oahppanbohtosiidda.
Oahpaheaddjenorpma mielde eai galgga ovtta oahpaheaddjis leat eanet go 15 oahppi 1.-4 luohkáin, eai ge eambbo go 20 oahppi 5.-10. luohkáin.
