Dušše 2 proseantta Norgga 15- ja 16-jahkásaččain borgguhit. Maŋimuš 20 jagi leat nuorra borgguheaddjit sakka unnon.
Dušše 2 proseantta Norgga 15- ja 16-jahkásaččain borgguhit. Maŋimuš 20 jagi leat nuorra borgguheaddjit sakka unnon.
Buot eará Europa riikkain borgguhit eanet 15- ja 16-jahkásaččat go Norggas, nu boahtá ovdan iskkadeamis man European Minitoring Centre for Drugs and Drg Addiction (EMCDDA) lea čađahan. Sii leat iskkan nuoraid duhpát-, alkohola- ja narkotihkageavaheami.
Unnit olbmot borgguhit
Unnit norgalaččat borgguhit ja áŋggirdeamit duhpáha vuostá dagahit ahte nuorat eai ge álgge borgguhit, oaivvilda Álbmotdearvvašvuođa gárrenmirkkoossodaga dutki Elin Kristin Bye.
– Dán áigge ii leat šat čaffat borgguhit. Nuorain lea rumaš, dearvvašvuohta ja skuvlabirgen olu deháleappot, ja danin eai soaitte álgit borgguhit, lohká son NRK:i.
Snuvssageavaheapmi lea lassána
1995:s vástidedje 30 proseantta nuorain ahte eai leat goassege borgguhan, 20 jagi maŋŋel lea lohku lassánan 70 prosentii.
Snuvssageavaheaddjit gal leat baicce lassánan nuoraid buolvvas.
– Snuvssageavaheapmi lea sakka lassánan, muhto mii oaidnit ahte dát logut maid njiedjagohtet, dadjá Bye.
Juohke guđet borgguheaddji árvvoštallá heaitit
20 proseantta borgguheddjiin oaivvildit ahte liiggástallojuvvo go muitaluvvo man váralaš duhpát leat olbmo dearvvašvuhtii, seammás árvvoštallá juohke guđát borgguheaddji heaitit borgguheames.
Nu čájehe Respons Analyse guorahallan mii lea čađahuvvon Norgga Dearvvašvuođadirektoráhta ovddas, čállá NTB.
Geahččalan moddii heaitit
Iskkadeamis boahtá maid ovdán ahte juohke goalmmát borgguheaddji lea geahččalan heaitit guovtti-golmma geardde.
Sii geat árvvoštallet bidjat eret duhpáha ballet ahte borgguheapmi galgá váikkuhit sin dearvvašvuhtii.
Iskkadeapmi lea dahkon Dearvvašvuođadirektoráhta ođđa borgguhan-heaitin áŋggirdeami oktavuođas.
2000 olbmo jápmet
Áŋggirdeapmi galgá erenomážit čalmmustahttit geahpesborasdávdda.
Geahpesborasdávda leat dat borasdávda mainna eanaš norgalaččat jápmet.
– Badjel 2000 olbmo jápmet jahkásaččat geahpesborasdávddain, ja dat leat menddo oallugat. Gosahat sáhttá geahpesdávdamearka, kronalaš gosahaga berre danin iskkahit doaktáriid luhtte. Erenomážit sii geat leat 40 jagi boarrásat berrejit mannat doaktára lusa, dadjá dearvvašvuođadirektevra Bjørn Guldvog NTB:i.
