Eurohpás geavahit dušše Ruoŧas eanet ruđa juohke fáŋgga nammii.
Norga mávssii badjel 2700 ruvnnu beaivái juohke fáŋgga ovddas 2017:s.
Jahkásaččat máksá Norga nubbin eanemus doalahit olbmuid giddagasain, nu čájeha ođđa iskkadeapmi man Eurohpáráđđi lea čađahan.
Dušše Ruoŧŧa geavaha eanet ruđa fáŋggaide, doppe máksá stáhta birrasii 3600 ruvnnu jándorii juohke fáŋgga ovddas.
Dánmárkkus ges mákse vuollel 2000 ruvnnu fáŋgga ovddas juohke jándora.
Unnidan goluid
Vaikke Norggas geavahit olu ruđaid giddagasdoaimmaide, de leat unnidan goluid 23,5 proseanttain 2016 rájes 2018 rádjái, čájeha Eurohpáráđi raporta.
Giddagasgolut dáidet njiedjan go fáŋgalohku maid njiedjá olmmošlogu ektui.
Nárkoduomut
Jus Norgga buohtastahttá eará Eurohpá riikkaiguin, de čájehuvvo earret eará ahte dáppe leat eanemus olgoriikka fáŋggat. Juohke goalmmát fáŋga ii leat norgalaš.
Norggas leat maid eanet fáŋggat go eará guovlluin geat leat ráŋggáštuvvon narkotihka geažil. Juohke njealját Norgga fáŋga lea dubmehallan narkotihka geažil.
Eurohpás ges leat gaskamearálaččat 17 proseantta fáŋggain ráŋggáštuvvon narkotihkkaáššiin.
(©NTB)
