-Almmuhus-
OĐĐASATNorgga falimus heargi ii searvva World Cup loahpaheapmái

Norgga falimus heargi ii searvva World Cup loahpaheapmái

-

-

Skuohtanjárggahasa Lemet Aslat Eira heargi D-costa lea leamaš Norgga bealde herggiin falimus dán jagi 1000 mehteris, áiggiin 1.14,98.

D-costa lea leamaš viđa gilvvus mielde dán dálvvi. Roavvenjárggas, Heahtás, Langojávrris, Guovdageainnus ja mannan vahkoloahpa Anáris. Lávvordatbeaivvi Anára gilvvuin ruohtai D-costa goalmmádin buoremus áigái olles gilvvuin, 1.14.98 Gonagasgilvvus Anáris vahkku áigi. Dat lea viehka buorre áigi. Hearggit, nu go Visa ja Ena, mat ledje fales hearggit, eai ruohttan goassige vuollel 1.15 áiggi, muitala Klemet Amund Eira.

 

Báhkkaluohkkai

Eira muitala Heahtá gilvvuin lei D-costas buoremus gaskkaáigi, muhto spiehkastii.

– Loaŋkosjávrris ja Guovdageainnus vuittii rabas luohká, ja Guovdageainnus lei falimus heargi olles gilvvuin. Doppe lei áigi 1.18.93, ja dainna beasaige báhkkaluohkkái, ja nu leige báhkkaluohkás Anára gilvvuin, muitala Eira.

 

Ii World Cup loahpaheapmái

D-costa ii searvva World Cup gilvvuid loahpaheapmái Guovdageainnus dán sotnabeaivvi.

– Mii vuolgit gilvalit Tankavaarai Supmii sotnabeaivvi, mat šaddet maŋemus gilvvut midjiide dán jagi, lohká Eira.

 

Stuorimus taleanta

Duottar Herggiid stivralahttu John Isak Sara lohká somán go Kárášjoga bealde maid ilbmet fas fales hearggit.

D-costa lea stuorimus taleanta dál Norggas, ja lea hui somá go Klemet Amunda bearaš lihkostuvvá, go Kárášjoga bealde eai leat šat go birrasii 20 gilvohearggi, lohká son.

 

Ollu mii ferte lihkostuvvat

Norgga bealde lea olahus 1.13.53 man Anne Risten Sara heargi Miila ruohtai 2005:s Buletjávrris, Guovdageainnus.

John Isak Sara muitala jus galgá bidjat olahusa 1000 mehteris, de ferte ollu lihkostuvvat.

– Mun láven lohkat ahte ii leat heargi mii bidjá olahusa, muhto siivu ja sabehat. Olbmo čalbmi ii oainne siivvu ja lea dušše hearggi gazza mii dovdá dan. Heargi gal ruohttá ovddas olles leahtus, ja jus lea juste muttágis garra siivu, de šaddá buorre áigi. Nubbi mii ferte doaibmat leat sabehat, ja sabetvuoidan lea olles dieđa, ja lea váttis deaivat rievttes vuoidasiiguin, lohká son.

 

Ii ábut hápmái geahččat

John Isak Sara lea goalmmát buolva gii dápmá gilvoherggiid, ja lohká lea maid váttis gávdnat buriid vuojániid.

– Lean fuobmán hámis ii leat ávki geahččat. Mis lei okta heargi, mas lei namma Royal, ja dat lei hui unni ja cuokkas inge mun jáhkkán das boahtá goassige vuoján. Buot gilvvuin, masa Royal searvvai, dat bođii finálii. Leat maid leamaš máilmmi čáppahámat hearggit, muhto go leŋge, de leat issoras láikkit eaige ruohta, muitala son.

 

 

 

 

-Almmuhus-