Dutkanjoavku lea iskan livččii go vejolaš Norgga beale lussii gierdagoahtit luossaparasihta Gyrodactylus salaris. Lea vejolaš, muhto ádjánivččii máŋgačuođi jagi, lohká dutkanjoavku
Luossaparasihtta Gyrodactylus salaris bođii Norgga jogaide 1970-logus ja leavai 51 johkii ja olu luossanálit jávke dahje geahnohuvve. Rotenon mirkkuin godde buot guliid 38 jogas ja jávkadedje parasihta, vihtta leat mirkkoduvvon ja gávcci leat vuordimin mirkkoduvvot, dieđiha NINA ruovttusiiddustis.
Dálkkádat- ja birasdepartemeantta bivddii Norgga Luonddudutkaninstituhta (NINA), Veterinearainstituhtta, INAQ, Aquagen ja Nuortta universitehta dutkiid dutkat ja árvvoštallat livčče go vejolaš oažžut luosa gierdagoahtit parasihta Gyrodactylus salaris lunddolaččat dahje nállašuhttimiin.
– Lea genehtalaččat vejolaš, muhto dat gáibidivččii olu barggu ja ádjánivččii máŋgačuođi jagi jus ii guhkit, lohká NINA-dutki Sten Karlsson, gii lea jođihan dutkanjoavkku.
Son čilge ahte dát čuožašii luossanáli hivvodahkii ja nállašuhttin váikkuhivččii hejot ja dainna bargguin sáhtášii parasihtta leavvat eanet jogaide.
