Viessoloanat divrot dás ovddos go dál loktanišgohtet reanttut. Dál lei vuosttaš geardde čieža jagis ahte reantu lassána.
Norgga Báŋku lokte reanttu 0,25 proseanttain, ođđa reantu lea lea dál 0,75 proseantta.
Lea vuosttaš geardde miessemánu 12. beaivvi 2011 rájes go reantu loktejuvvo, ja lea vuosttaš geardde badjel guovtti jagis ahte stivrenreantu lihkahallojuvvo.
Dál dieđiha Guovddášbáŋku ahte doaivumis loktana reantu vel oktii boahtte jahkebealis.
– Nu go mii dál árvvoštallat ášši ja riskagova, de orru leamen nu ahte stivrenreantu loktejuvvo fas vuosttaš kvartálas 2019:s, dadjá guovddášbáŋkohoavda Øystein Olsen ovtta dieđáhusas.
Orru maid čájeheamen ahte reantu loktana vel oktii loahpageahčen boahtte jagi.
Divrasit viessoloatna
Go reantu odne loktanii, de ii leat reantu šat historjjálaččat vuollegaš, ja dat mearkkaša dan ahte viessoeaiggádat dál fertejit ráhkkanit divrasit viessoloatnareanttuide.
Norgga Báŋku einnosta ahte gaskamearálaš viessoloatnareantu loktana 2,5 proseanttas vuollel njealji prosentii golmma jagis. Dat mearkkaša ahte viessoloatnareantu divru measta duppalit eanas viessoloanain golmma jagis.
Vel eambbo reanttut
Guovddášbáŋku deattuha dárbbu vel eambbo reantolasáhusaide boahtteáiggis.
– Oaidnu ja riskagovva čájeha ahte reantu loktana boahtevaš jagiid. Jus stivrenreantu dollojuvvo dálá dásis beare guhká, de sáhttet hattit ja bálkkát lassánit beare jođánit ja ruđalaš dássehisvuohta beassá lassánit vel eambbo, čállá Guovddášbáŋku.
