Riikajoavkohárjeheaddjis lea buoret jáhkku Álttá-bárdnái, Kroghai, go Northugai ja Klæboi.
Dál lea badjelaš čuođi beaivvi vel dassái go lea OG Pyeongchangas, muhto riikajoavkohárjeheaddji, Tor-Arne Hetland, lea juo mearridan gii Norgga stafeahttajoavkkus galgá maŋemus vuorus čuoigat.
Ii šatta Northug, iige Klæbo
Sihke Petter Northug, Johannes Høsflot Klæbo ja Finn Hågen Krogh sáhttet čuoigat maŋemus vuoru stafeahtas.
Vaikko leat buorit čuoigit, de lea hárjeheaddji juo mearridan 106 beaivvi ovdal.
– Min áŋkorolmmái galgá leat Finn Hågen Krogh. Mannan dálvvi čájehii son ahte lea min buoremus olmmái dan bargui, nu ahte diekko mis ii leat eahpádus, dadjá Hetland NRK:i.
Vaikko Hetlandas lea buorre jáhkku Kroghii, de vástida Krogh ná:
– Lea hui buorre gullat ahte hárjeheaddjis lea jáhkku munnje, muhto guhkes dálvvis lea olu mii sáhttá dáhpáhuvvat. Mun dieđán ahte ferten čájehit ahte sáhttet ain luohttit munnje, vai beasan čuoigat maŋemus vuoru stafeahtas, dadjá Finn Hågen Krogh.
