Leahttu lea mearkkašahtti sivvan johtolatlihkohisvuođaide, ja olu jápminlihkohisvuođat gevvet go lea alla leahttu. Liikká válljejit muhtumat girddihit.
Leahttu lea mearkkašahtti sivvan johtolatlihkohisvuođaide, ja olu jápminlihkohisvuođat gevvet go lea alla leahttu. Liikká válljejit muhtumat girddihit.
Ođđa iskkus čájeha ahte gávccis logis mieđihit iežaset rihkkut leahttoráji dávjá, ja ahte okta logis leat vuodján 150 km/dii dahje eambbo Norgga luottain. Sii mieđihit ieš mielaid girddihan.
Kantar TNS lea čađahan iskosa Trygg Trafikk ovddas, ja das bođii ovdan ahte 86% sis geat ledje mielde iskosis, rihkkot leahttoráji muhtomin dahje dávjá. Juohke logát mieđiha rihkkon dán juohke háve go vudjet biillain.
Issoras go ná oallugat rihkkot leahttorájiid, oaivvilda Trygg Trafikk.
– Leahttu lea mearkkašahtti sivvan johtolatlihkohisvuođaide, ja olu jápminlihkohisvuođat gevvet go lea alla leahttu. Lea issoras go ná oallugat válljejit rihkkut leahttoráji. Dat áidna sihkkaris vuohki vuodjit lea doalahit dan leahtu maid lea lohpi, lohká Trygg Trafikk seniorráđđeaddi, Bård Morten Johansen.
Dievddut leat vearrámusat
Dievddut leat vearrámusat girddihit. 92% lohket iežaset rihkkut leahttolobi muhtomin dahje dávjá.
42% lohket iežaset vuodján 120 km/dii dahje eambbo Norgga luottain, ja 11% vástidit iežaset vuodján 150 km/dii.
Goas dat lea lohpi?
Iskosis boahtá maid ovdan goas norgalaččaid mielas lea ortnegis girddihit.
Luottain gos leahttorádji lea 80 km/dii dahje eambbo, de eai olbmot datge beroš. 32% mielas lea ortnegis girddihit, 45% oaivvildit dat lea veahá duođalaš ja 36% mielas lea ortnegis go eai oidno eará biillat. Olles 60% oaivvildit dat lea ortnegis rihkkut leahttoráji go lea meaddel vuodjimin – vaikko dat ii ge leat lohpi.
Dohkketmeahttun girddihit mánáiguin
Eatnasat leat ovttaoaivilis dása.
73% oaivvildit ahte lea hui duođalaš dahje dohkketmeahttun girddihit go mánát leat mielde biillas. 87% oaivvildit maid ahte lea dohkketmeahttun girddihit gili siste.
Ballet sorbmet earáid
85% oaivvildit ahte stuorámus ballu lea sorbmet earáid go rihkkot leahttoráji, ja 66% fas ballet iežaset sorbmet dahje jápmit. Dušše 34% vástidit ahte sii ballet massit vuodjinkoartta.
Vaikko leat unna erohusat, de leat eambbo dievddut geat ballet massit vuodjinkoartta dahje sáhkohallat.
– Iskosat čájehit ahte mii fertet rievdadit dábiid, loahpaha Bård Morten Johansen.
