Dušše 26 proseantta norgalaččain ráhkadit bušeahta.
Dušše 26 proseantta norgalaččain ráhkadit bušeahta.
Olles Europas beroštit norgalaččat unnimusat ráhkadit bušeahta. Dušše 26 proseantta norgalaččain ráhkadit bušeahta jeavddalaččat, čájeha DnB guorahallan man Repons Analyse lea čađahan.
Ránnját sakka čeahpibut
Ránnjáriikkain leat čeahpibut ráhkadit ja eallit bušeahtain čájeha iskkadeapmi, olles 63 proseantta dánskalaččain ja 42 proseantta ruoŧŧelaččain ráhkadit bušeahta. Gaskamearálaččat ráhkadit 61 proseantta eurohpalaččain bušeahta, greikalaččat ja polskalaččat leat čeahpimusat, masá 80 proseantta ráhkadit bušeahta.
Issoras go norgalaš ii beroš
Stáhta golahusdutkama (SIFO) golahusekonomiija ja golahuspolitihka dutkanjođiheaddji Elling Borgeraas mielas lea hirpmáhuhtti go norgalaš ii beroš ráhkadit bušeahta.
– Norgalaččain leat stuora loanat ja mii geavahit dávjá kredihtakoarttaid, ja dalle lea hui dehálaš ahte olbmos lea buorre ollislašgovva iežas ekonomiijas. Lea viehka issoras go norgalaččain váilu dát, ja go eai beroš ráhkadit bušeahta, lohká son NTB ođasdoaimmahahkii.
