Eambbo go bealli nuoskkideames mii lea Murmansk Oblastas boahtá Eurohpás ja erenoamážit Norggas, dan čuoččuha Murmánskka ekologiija departemeantta ovddasteaddji.
Eambbo go bealli nuoskkideames mii lea Murmansk Oblastas boahtá Eurohpás ja erenoamážit Norggas, dan čuoččuha Murmánskka ekologiija departemeantta ovddasteaddji.
– Measta 52 proseantta buot ávdnasiin mat nuoskkidit Murmansk Oblasta birrasa, bohtet Eurohpás, dajai Vladimir Khrutsky guhte lea doaibmi várreministtar Murmansk Oblast Luondduresursa ja Ekologiijadepartemeanttas. Barentobserver čállá ahte Khrutsky dajai dán birrabeavddedigaštallamis ekologiija birra Murmánskkas duorastaga.
Nuoskkideapmi unno
Khrutsky mielde eai leat sin departemeanttas makkárge moaitámušat Guoládaga industriija fitnodagaid hárrái, son baicce rámiidii dáid fitnodagaid guhkit áigge ja lihkostuvvan birasgáhtten barggu ovddas.
– Olgoriikkalaš birasgáhttensearvvit dávjá garrasit moitet Ruošša fitnodagaid, vaikke min nuoskkideamit čađa njidjet ja muosehuvvon ekosystemat ealáskit, dajai son Rossiyskaya Gazeta dieđuid mielde.
Eai luohte dutkamuššii
Ruošša ekologalaš searvi Green Patrol maid lea čuoččuhan ahte Norga nuoskkida Ruošša, jo 2013:s. Dalle dadje ahte Norgga mirkkosuovat nuoskkidit Ruošša 2.4 geardde eanet nitrogena ávdnasiiguin, go maid Ruošša dahká nuppe guvlui. Norgga dutkit leat moaitán dán dutkamušas váilot dieđalaš dokumentašuvnna.
Muhtin Ruošša dutkit leat maid dadjan ahte ii gávdno dokumentašuvdna mii duođašta man olu Norga nuoskkida Ruošša.
– Eahpe-konstruktiiva moaiti
Bellona Murmansk searvi lei áidna birasgáhtten NGO-searvi (journ. meark: searvi mii ii gula eiseválddiid vuogádagaide) mii lei bovdejuvvon duorastaga digaštallamii. Sii šadde vástidit manne leat nu gierdameahttumat nuoskkidaneastadeami njoazes ovdánemiin ja maiddái Norgga birasgáhtten váttisvuođaid ovddas.
Go Bellona ovddasteaddji Anna Kireeva ovdanbuvttii ahte diet nuoskkideamit maidda Khrutsky čujuhii oidnojuvvojit eahpeluohtehahttin sihke olgoriikka ja Ruošša dutkiid bealis, de Kireeva galgá leat gohčoduvvon eahpe-konstruktiivalaš moaitin.
