Diibmá lei Norggas eanet buozalmasjávkan go ovdal pandemiija, čájeha Statistihkalaš guovddášdoaimmahaga almmolaš buozalmasjávkanstatistihkka.
2011 rájes gitta 2019 rádjái lea buozalmasjávkan leamaš dásset, muhto jávkan lassánii pandemiija maŋŋel ja jagi 2022:s lei eanet buoalmasjávkan go goassege ovdal.
Diibmá njiejai jávkan áibbas unnán, ja cuoŋománu, miessemánu ja geassemánu áigodagas de fas goarkŋui jávkan.
– Buozalmasjávkanlogut, maid almmuhedje dán vahku, čájehit ahte Norggas lea ain alla buozalmasjávkan, njeallje jagi maŋŋel go koronapandemiija bođii, lohká doaimmahaga seniorráđđeaddi Erik Horgen.
Son lohká ahte guhkesáigásaš buozalmasjávkamis lea stuorámus jávkan ja čujuha dasa ahte olles ovcci miljovnna 12 miljovnna bargobeaivvis lea doavtterdieđihuvvon buozalmasjávkan.
Bargonávccaid iskkadeamit eará riikkain čájehit ahte Norga ii leat áidna riika mas lea leamaš alla buozalmasjávkan gaskal 2020 ja 2023, muhto dušše moatti Eurohpá riikkas lassánii jávkan sakka 2022:s ja 2023:s.
– Eanaš eará riikkain njiejai jávkan diibmá ja ovddit jagiin, dadjá Horgen.
(©NTB)
