Go Norga váldá badjelassii Árktalaš ráđi jođiheami dán jagi miessemánu 11. beaivvi, de gáržžiduvvo oktavuohta Ruoššain.
Maŋŋel go Ruošša fallehii Ukraina, de bissehuvvojedje ráđi virggálaš čoahkkimat. Disdaga ovdanbuvttiiga olgoriikkaministtar Anniken Huitfeldt (Bb) ja dálkkádat- ja birasministtar Espen Barth Eide (Bb) Norgga vuoruhemiid ráđđái 2023-2025 áigodagas Framsenteris Romssas.
Norgga vuoruheamit leat mearra, dálkkádat ja biras, ceavzilis ekonomalaš ovdáneapmi ja olbmot davvin. Norga áigu deattuhit nuoraid ja árktalaš álgoálbmogiid.
– Mii áigut bargat dan ala ahte nannet vejolašvuođaid mat árktalaš nuorain leat váikkuhit ja beroštit áššiin mat váikkuhit sin eallimii ja boahtteáigái. Mii áigut maiddái nannet ovttasbarggu árktalaš álgoálbmogiid organisašuvnnaiguin, dadjá Huitfeldt.
Ruošša olgoriikaministtar Sergej Lavrov lea bovden Norgga ja eará ráđi lahtuid Sibirijás miessemánus ovdagotti joatkimii.
– In áiggo dás oassálastit. Mii háliidit muhtunlágan oktavuođa, muhto ámmátdásis sáhttit sirdit ovdagotti Ruoššas Norgii. Politihkalaš ministtarčoahkkin Ruoššas ii šatta, dadjá Huitfeldt.
Geassemánus diibmá mearridedje dat eará miellahttoriikkat joatkit ráđi doaimmaid Ruošša searvama haga.
– Lei dárbu bissehit ovttasbarggu. Mii eat sáhttán čohkkát seamma beavddi birra go Ruošša ja dahkat dego ii mihkkege livčče dáhpáhuvvan, lohká olgoriikaministtar.
