Sámiráđđi lea beahtahallan Norgii, go dálkkádatšiehtadallamiin evttohit fámuhit álgoálbmogiid vuoigatvuođaid.
Sámiráđđi lea beahtahallan Norgii, go dálkkádatšiehtadallamiin evttohit fámuhit álgoálbmogiid vuoigatvuođaid.
– Mii gal leat hirpmahuvvan ja beahtahallan go Norga vel, mii dábálaččat álo doarju olmmoš- ja álgoálbmotvuoigatvuođaid, evttohii dan, lohká Sámráđi presideanta Aile Javo.
Odne leat Norgga delegašuvdna COP21 dálkkádatnjunuščoahkkimis, evttohan sihkkut olmmoš- ja álgoálbmotvuoigatvuođaid teavstta paragráfa, ja sirdit dan šiehtadusas álgosátnái.
Lágalaččat erohus
Javo čilge erohus lea jus dat teaksta sirdo ovdasátnái, go de eai leat stáhtat lágalaččat čadnon nu garrasit.
– Go lea paragráfas mielde, de čatná riikkaid lágalaččat čuovvut mihá čavgadeappot. Norga lea maid oččodan eará stáhtaid mielde doarjut sin evttohusa.
ON dálkkádatnjunuščoahkkimis COP21:s galget 200 stáhta, 120 stáhtanjunnoša ja máŋga duháha organisašuvnna mearridit ođđa ja juridihkalaččat čadni šiehtadusa, mii galgá johtui biddjot 2020:s.
Fertejit feaskárastit
Javo lohká sii fertejit dál geahččalit feaskárastit eará stáhtaid ektui.
– Mii fertet váikkuhit geahččalit eará stáhtaid man dehálaš lea bisuhit dan olmmoš- ja álgoálbmotvuoigatvuođaid paragráfan. Mii fertet fáhtet ságaide riikkaid njunnošiid, ja leat bivdán ságaide Suoma, Ruoŧa ja Kanada go dat leat riikkat gos leat álgoálbmogat. Álgoálbmogat leat miehtá máilmmi, ja fertet riikkaid, gos álgoálbmogat leat, oažžut iežaset álbmoga doarjut, lohká Javo.
Eai dieđe vel manne
Javo ii dieđe manne Norgga delegašuvdna lea buktán dákkár evttohusa, ja go Ávvir hupmá suinna, de lea son manname čoahkkimii gos áigu dáhttut čilgehusa Norgga delegašuvnnas.
Sámediggepresideanta Aili Keskitalo, gii ieš ii leat vel Parisas, muhto lea jođus dohko, muitala Sámedikkis lea maid ovddasteaddji doppe, guhte lea mielde čoahkkimis dál Norgga delegašuvnnain.
– Mii gal leat maid beahtahallan ja hirpmahuvvan go Norga nie searvá fámuhuhttit olmmoš- ja álgoálbmotvuoigatvuođaid, iige das vel galle, sii leat njunnošis evttohusain, lohká Keskitalo.
Earát eai doarjjo
Keskitalo lohká lei ovdagihtii doalahan ahte olmmoš- ja álgoálbmotvuoigatvuođat bisuhuvvo váldodokumeanttas, muhto leat rievdadan oainnu ja jorggihan.
– Ođđa evttohusas han váldo eret álgoálbmotperspektiiva, ja jus Norga ja Davviriikkat, mat álo leat dorjon álgoálbmogiid, eai doarjjo álgoálbmotvuoigatvuođaid, de eai ollenge eará riikkat daga dan. Mii Sámedikki bealis eat gal doarjjo dien, lohká son.
