Norggas gártet leat menddo moattis geain lea fidnofágalaš oahppu joatkkaskuvllas boahttevaš jagiid, čájeha SSB ođđa raporta.
Bargosadjemearri njiedjá industriijas, petroleumsguoskevaš gávpedoaimmain ja gálvogávppašeamis, muhto vurdo ahte lassána almmolaš gávpedoaimmain ja priváhta bálvalusas boahtte 20 jagis.
Dat boahtá ovdan SSB-raporttas, Ovdaárvvoštallan bargoveagas ja jearru bargonávccas nationala dásis iešguđet oahppojoavkkuin gitta jahkái 2040.
– Jus eai biddjo johtui doaibmabijut, de lea stuorra jáhkkehahttivuohta ahte dát vátni stuorru ovddos guvlui, muitala seniordutki Nils Martin Stølen, gii lea leamaš mielde čállimis raportta.
Eambbosat alit oahpuin
Raporta čájeha ahte eambbosat váldet alitoahpu boahttevaš jagiid.
Dađistaga go rávváset olbmot mannet penšuvdnii, molsojuvvojit olbmot geain lea oahppu mánáid- ja joatkkaskuvllain olbmuide geain leat alitoahppu.
Dat mielddisbuktá ahte šaddet eambbosat geain lea bachelor- ja masteroahppu, muhto ii leat sihkar ahte buohkat ožžot barggu mii gáibida dan.
– Vaikke lea mearkkašahtti lassáneapmi jearus guoská dát earenoamážit ekonomiija ja hálddáhusa, servvodatfágs ja humanisttalaš fágaid ohppui, muitala Stølen.
Dutkan- ja alitoahppoministtar Henrik Asheim (O) muitala ahte allaoahppan álbmot lea buorre sihke eaŋkilolbmui ja servvodahkii, ja ovdaárvvoštallan čájeha ahte dárbu dušše lassána jagiid mielde.
– Danne lea dehálaš ahte ain veahkehit eambbosiid váldit oahppoduođaštusa dahje fágareivve, ja ahte eambbosat ollistit fágaskuvlla, allaskuvlla dahje universitehta oahpu, dadjá Asheim.
(©NTB)
