Helge Nitteberg (34) váldá badjelasas váldodoaimmaheaddjiámmáha Nordlys áviissas, maŋŋil Anders Opdahla, guhte dál heaitá ja álgá NRK:i bargui.
Helge Nitteberg (34) váldá badjelasas váldodoaimmaheaddjiámmáha Nordlys áviissas, maŋŋil Anders Opdahla, guhte dál heaitá ja álgá NRK:i bargui.
– Mun lean hui duđavaš go virgáibidjat Helge. Su bokte oažžut ovddasmanni, gelbbolaš ja ođđaáigásaš mediajođiheaddji. Nordlys lea hui dehálaš áviisa sihke Amedia ja norgga almmolašvuođas. Áviisa lea maåimuš jagiis viehka burese ovdánan iežas márkanis davvin. Dás lea Helges jo stuorra oassi, ja mii leat oadjebasat ahte son joatká ain ovdánahttit áviissa, lohká Nordlysa stivrrajođiheaddji, konsearnadirektevra Pål Eskås Kampanje áviisii.
Álgá vuossárgga
Helge Nitteberg lea eret Leaŋgáviikkas Tromssas. Sus lea oahpaheaddjioahppu, muhto eanaš bargan journalistihkain. Nitteberg lea leamaš luođobargi ja journalista Adresseavisenis, Troms Folkebladas ja Nordlysas, muhto lea 2010 rájes leamaš oassin Nordlysa jođiheamis ođasdoaimmaheaddji ja váldodoaimmaheaddji sadjásažžan.
– Mun lean vuollegaš ja rámis go oaččun dán vejolašvuođa. Nordlys lea áviisa mas lea fantásttalaš árbevierru ja fuomášuhtti vuoitinvuoibmi dálá mediabirrasis, lohká Nitteberg ieš.
Nitteberg virggálaččat váldá badjelasas ovddasvástádusa dálá váldodoaimmaheaddjis, Anders Opdahlas, vuossárgga geassemánu 6. beaivvi. Seamma beaivvi álgá Opdahl NRK Davvi-Norgga redaktevran.
– Rivttes almmái
Anders Opdahl lea ilus go Helge Nitteberg lea virgáduvvon jođihit Nordlysa viidáseappot.
– Helge lea leamaš doaimmaheaddjin Nordlysas máŋga jagi ja stuorra oassi gudnis go Nordlysas lea dat sajádat mii lea, gullá maiddái sutnje. Son lea rivttes almmái rivttes virggis, ii leat ii eahpádus ge, lohká Opdahl Nordlys áviisii.
