-Almmuhus-
VALÁŠTALLANNordlys vuoittáhalai ruovttušiljus

Nordlys vuoittáhalai ruovttušiljus

Journalista

-

-

Sotnabeaivve finadii Sállan Glimt Niitoguolbanis, čiekčame Nordlysa vuostá.

Nordlys čiekčit šaddet ain vuordit iežaset vuosttaš golbma čuoggá, go Sállan Glimt ledje beare gievrrat ja vuite čiekčama 2-1. 

Nordlysa Sander Rasmussen Laiti bážii vuosttaš moala, ja Nordlys birgii bures dassái go čiekčan lei bistán 75 minuhta.

De coggalii Jørgen Daniel Eira Sállan Glimta vuosttaš moala. Guokte minuhta badjel áiggis bážii Gunnar Fallsen moala, mii dagahii ahte buot golbma čuoggá vulge mielde Sállanii. 

Sállan Glimt finadii lávvordaga čiekčame Deanu vuostá, ja dan čiekčamis šattai boađus 2-2. 

 

Porsáŋgu vuoittáhalai

Porsáŋggu bártnit finadedje Girkonjárggas čiekčame Girkonjárgga vuostá.

Girkonjárga vuittii čiekčama 3-2. Porsáŋggu moallabáhččit leigga Mads Petter Utsi ja David Koikoi Jallah. 

Maŋŋel go eanas joavkkut leat čiekčan njeallje čiekčama, de lea Porsáŋgu dál njealjádin ovcciin čuoggáin, Deatnu gávccádin njeljiin čuoggáin ja Nordlys lea buot vuolemusas nulla čuoggáin. 

 

Boahtte čiekčamat

Boahtte čiekčamat leat miessemánu 16. beaivvi.

Dalle deaivvada Porsáŋgu Honnesvágiin Porsáŋggus, ja Nordlys Deanuin Niitoguolbanis. 

-Almmuhus-