-Almmuhus-
-Almmuhus-
-Almmuhus-
VALÁŠTALLANNordlys beasai máistit Báktevári dálkasa

Nordlys beasai máistit Báktevári dálkasa

-

-

Odne lei gilvu duoddara badjel, gos Guovdageainnu ja Nordlys dievddut deaivvadedje Bákteváris. Guovdageaidnu vuittii 3-0, ja Nordlys beasai máistit Báktevári dálkasa, nu go Báktevári luođis dajahallet. Geahča videoid!

Ledje ollu olbmot čoahkkanan Báktevárrái odne, go Guovdageainnu ja Nordlys dievddut deaivvadedje, gilvalit “duoddara gonagasat” tihttela badjel. Dá lei vuosttaš ráidočiekčan goappaš joavkkuin, ja čiekčamat leat ožžon olu fuomášumi go TV2 sáddii olles čiekčamiid njuolggosáddagis. Geahččit ledje boahtán goappaš joavkkuid doarjut, ja lei ealas Bákteváris.

Ii máhte čilget vuoitindovddu
Guovdageaidnu nahkehii golbma moala, ja moallabáhččit ledje Nils Erik “Nippa” Oskal, Johan Egil Pulk ja Nils Johan “Gino” Eira. Nuorra čiekči Johan Egil Pulk ii máhte báljo čilget dovddu mii sus lea maŋŋil čiekčamiid.
— Ferte suohttaseamos leat olles dán čiekčanáigodagas, dat lea nu somá, dan ii sahte baljo čilget.

Movt orru dál go TV2 vel lei filbmeme čiekčamiid?
— Dat ii lean leaika, nu balus gal ledjen, doarggistii olles gorut, measta olles viessu ovdal čiekčamiid. In dieđe movt oba dusten ge mannát spábbačiekčanšilljui, dat lei oba issoras. Muhto bures mii čievččaimet, eat luoitán ovtta ge moala, ferte buorre leamaš, dadjala Johan Egil Pulk Ávvirii ovdal go manai ávvudit

Báktevári dálkasa
Ovdal go čiekčamat álge, de besse sihke tv-geahččit ja geahččit Báktehárjjis gullat Báktevári luođi. Dan luođi lea Johan Anders Eira bidjan, ja son oassalastii Sámi Grand Prixas dainna luđiin 1992s.
Luođis dajahallá ge Báktevári searaid, ja go eará joavkkut bohtet Báktevárrái, de gal besset máistit dan Báktevári dálkasa.

Geahča filmma vuolemusás áššis!

—Bissut áin gonagassan!
Guovdageainnu čiekči Mihkkal Ante Oskal dajai TV2ii ovdalaš dán vahkku ahte jus sii vuoittahallet, de sii heitet spábbačiekčamiin.
— Dat gal lea nu go mun juo dihtet dat boahtá geavvat, dan lean álo diehtán ahte Nordlysa vuostá eat vuoittahala! Mii bissut áin gonagassan, ja sii áin prinsat, reaškkiha spábbačiekči maŋŋil go čiekčan nogai.

-Almmuhus-