Kárášjoga gielda lea fállan oastit priváhta eatnamiid, vai Nordlys Valáštallansearvi sáhttá ollašuhttit iežas prošeavtta ráhkadit juvlasabetšilju ja dainna lágiin viiddidit iežaset čuoiganfálaldaga maiddái geassái.
Kárášjoga gielda lea fállan oastit priváhta eatnamiid, vai Nordlys Valáštallansearvi sáhttá ollašuhttit iežas prošeavtta ráhkadit juvlasabetšilju ja dainna lágiin viiddidit iežaset čuoiganfálaldaga maiddái geassái.
Kárášjoga gieldda teknihkalašossodat lea sádden viđa priváhta olbmui jearaldaga oastit sis eatnamiid valáštallanhálla guovllus Niitonjárggas, mat leat regulerejuvvon friijaguovlun. Gielda vuođušta ohcamis, ahte duogáš ohcamii lea go Nordlys Valáštallansearvi áiggošii viiddidit iežaset čuoiganguovllu, mii lea ávkin olles álbmogii.
Eai sáhtte hukset
Dasa lea Valáštallansearvvi jođiheaddji Egil Olli hui ilus ja rámida gieldda bargovuogi, mainna sávvá dál oažžut leavttu prošeaktaálggaheapmái. Ulbmil eatnamiin, muitala son lea hukset plánejuvvon juvlasabetšilju.
– Mii leat geavahan eatnamiid dán rádjái, nu ahte eat leat dárbbašan máksit láiggu. Muhto eat sáhte hukset maidige bissovaččat, nu guhká go leat priváhta eatnamat, čilge Olli.
Prošeakta, man valáštallansearvi lea plánen gárvvisin, máksá birrasii guokte miljovnna kruvnnu.
– Plánas lea ráhkadit beannot kilomehtera guhku juvlasabetšilju, iige leat hálbi. Muhto mii leat bargamin dainna, dadjá son.
Ožžon doarjaga
Mii muititge ahte Nordlys Valáštallanjoavku oaččui geassemánu beallemuttus juolluduvvot 20 .000 kruvnnu Sparebáŋku1 Davvi-Norggas justa fal dán prošektii.
Searvvis leage plánas ráhkadit Niitojoga stadionii juvlasabetšilju. Jurdda lea ahte mánát ja nuorat sáhttet sihkkaris sajis hárjehallat juvlasabehiiguin. Mii dattetge eat leat beassan bidjat prošeavtta johtui, go guovlu gosa áiggošedje šilju ráhkadit, gullá priváhta olbmuide.
– Stuorámus sivva prošektii lea, go lean ieš maiddái geahččalan juvlasabehiiguin biilageainnu alde ja doppe lea stuorra biilajohtalus, mii lea hui issoras. De ádden go váhnemat eai luoitte mánáid ja nuoraid geainnu ala čuoigat, dovddasta Olli.
Dasa lassin lea searvi maiddái sádden iežas plánaid gildii, ja Seastinbáŋku 1 Davvi-Norga lei buorre veahkki viidáset prošeavttain bargat.
– Mun doaivvun maid ahte earát sáhttet maid min veahkehit viidáset prošeavttain nu ahte mii sáhttit ollašuhttit plánaid, lohká Olli.
Easka gulahallanmuttus
Kárášjoga gieldda teknihkalašossodaga doaibmi gielddalašhoavda Helge Nystad lohká sis áigumuššan leamaš jo máŋga jagi oastit dáid eatnamiid, muhto eai leat astan dainna ovdal bargat.
– Dát eatnamat leat regulerejuvvon olgodoaimmaide, gosa eananeaiggádat eai beasa hukset stobuid, čilge Nystad.
Son goittot lohká eananoastinprošeavtta leat áibbas álgomuttus, eaige dieđe vuos man ollu gártá máksit gildii, eaige dieđe vuos guđe láhkai galget ruhtadit oastima. Nystad ii muitte justa man stuorra eananbihtáin lea sáhka, iige háliit dál vuos čiekŋudit hattiid birra maidige.
– Mii leat easka álgán gulahallat eananeaiggádiin ja lea ollu maid mii fertet vuos čielggadit, deattuha son.
