-Almmuhus-
-Almmuhus-
-Almmuhus-
OĐĐASATNominere­juvvon beakkán bálkka­šupmái

Nominere­juvvon beakkán bálkka­šupmái

-

-

Guovdageaidnulaš sáhttá oažžut stipeandda vai beassá doaimmahit musihka.

Elina Ijäs lea okta 400 nuoras geat leat nominerejuvvon Niehkostipeanda-bálkkašupmái.

– Dat lea dieđus hui somá. Earenoamážit go dat diehtu ii boahtán nu guhká maŋŋel go ohcen, in lean vuordán vástádusa ovdal giđa bealde. Attii duođai motivašuvnna joatkit, dadjá Ijäs.

Ovdánit musihkain

Juohke jagi ožžot 50 nuorra kulturbargi 30 000 ruvnno, mii galgá veahkkin sin kulturdoibmii. Musihkkáris leat stuora plánat jus oažžu stipeandda.

– Háliidivččen geavahit dan buvttadit ja almmuhit lávlaga. Oažžut veahki buvttadeddjiin ja studio láigohit. Diekkár goluide manašii stipeanda, dadjá Ijäs.

Ollesáigge musihkkár

Son lea maŋemus jahkebeali geahččalan eallit musihkain, vaikko lei dieđihan iežas alitoahppokursii jus dette ii šatta nu ollu bargu korona geažil.

– Jurddašin jus ii šatta nu olu bargu musihkain, go máilbmi lea dál nu go lea, muhto de goitge šattai ollu bargu. Lei ollu eanet go ledjen hárjánan. Studeren šattai dego lassibargu, ja fertejin veaháš vuoruhit, muitala Ijäs.

Geasset almmuhit

Miessemánu beassá son diehtit lea go son okta dan 50:s geat ožžot stipeandda. Geassemánu almmuhuvvojit vuoitit.

– Lea guhkki vuordit, muhto nu lea. Olmmoš ii sáhte ovttatmano oažžut vástádusa, muhto lea goit gelddolaš oaidnit, lohká Ijäs.

Gudnin nuoraide

Norsk Tipping ja Norsk kulturskoleråd juhket oktiibuot 1,5 miljovnna ruvnno 2022 Niehkostipeandda bokte.

– Máŋgasiidda lea stuora gudni nominerejuvvot. Vásihit ahte lea stuora mearkkašupmi čeahpes kulturbargiide geain ollu gelddolaš ja fiinna kultuvrralaš niegut leat. Nominerejuvvon nuorat maid bohtet oidnosii iežaset barggu ovddas báikkálaččat, ja našunála dásis, čállet Norsk kulturskoleråd ja Norsk Tipping neahttasiiddus.

-Almmuhus-