-Almmuhus-
-Almmuhus-
KULTUVRA Nohkatmeahttun beaivvit Dáiddadálus

Nohkatmeahttun beaivvit Dáiddadálus

-

-

Susanne Hætta lea dáiddár plakáhtas go Dáiddadállu, Guovdageainnu dáiddakollektiiva rahpá iežaset njealját beassáščájáhusa.

Dáiddadálus leat dál 17 sámi dáiddára miellahttun. Okta dain ođđasepmosiin kollektiivvas lea girječálli, govvejeaddji ja dáiddár Susanne Hætta.

Dáiddadállu addá Guovdageainnu servodahkii ja earáide vejolašvuođa oahpásnuvvat Hætta dáidagiin ja máhtuin go rahpá beassáščájáhusa.

 

Ovttageardánis niehku garra duohtavuođas

Susanne Hætta ráhkada govvadáidagiid ja čájeha prošeavtta «Neverending Days – Nohkatmeahttut beaivvit» Dáiddadálus beassášvahkku.

Govat govvidit globála liegganeami ja dálkkádatrievdama, mat čájehit dan seamma luonddu maid min máttut leat duolbman máŋga duháha jagi. Dat lea ráhkisvuođajulggaštus ovttageardánis nihkui ahte luondu lea agálaš ja beaivvit mat eai goasse noga.


Susanne Hætta govva «Várjjat».

Hætta lea eret Álttás, gullevašvuohta Guovdageidnui ja Viestterállasii maid, muhto orru Čáhcesullos. Hætta ovddeš čájáhusat leat čájehuvvon sihke Oslos, Bearalvágis, Čáhcesullos ja Johkamohkis.

Son lea maiddái almmuhan olu girjjiid, earret eará govvagirjji Mari Boine birra.

 

Ovddeš beassáščájáhusat Dáiddadálus

2015:is lei Dáiddadálus čájáhus báikkálaš nuoraiguin geat beroštit ja máhttet málet, tevdnet ja govvet. 2016:s lei guossečájeheaddji Guatemalas eret gii govvidii reflekšuvnnaid dan áiggis go lea orron ja bargan Guovdageainnus ja Sámis teahterbihtain «Vidas Extremas».

2017:s lei dáiddar Elle Sara Oskal geas lei iežas vuosttaš almmolaš čájáhus. Dán jagi leat rahpan uvssaid iežaset Susanne Hættai.

Váldočájáhussii lassin leat vel dáidagat, girjjit ja buktagat maid Hætta ja dat eará dáiddárat kollektiivvas leat ráhkadan maid lea vejolaš oaidnit ja oastit.

- Advertisement -
-Almmuhus-