-Almmuhus-
OĐĐASATNOAH reagere go Ovddádusbellodat dáhttu stuoridit fáles- ja njuorjobivddu

NOAH reagere go Ovddádusbellodat dáhttu stuoridit fáles- ja njuorjobivddu

-

-

Dutkit miehtá máilmmi dieđihit nállivalljivuođa njiedjama, de dadjá Ovddádusbellodaga Bengt Rune Strifeldt ahte háliida lasihit fáles- ja njuorjobivddu.

Gieskat čađahii Opinion jearahallama NOAH:in ja olgoriikka elliidsuodjalanorganisašuvnnaid ovddas. Bohtosat čájehit ahte eanaš norgalaččat eai oainne dárbbu goddit eambbo fálláid bierggu dihtii.

Dušše njeallje proseantta dadje ahte sii borret fálesbierggu dávjá, ja 2/3 dadje ahte eai bora fálesbierggu obanassii, dahje ahte eai leat dahkan dan guhkes áigái.

Ahkejoavkkus 18-29 ii leat oktage gii dieđiha ahte borret fálesbierggu dávjá, ja 75 proseantta dain dadjet ahte eai leat goassige borran fálesbierggu, dahje ahte eai leat dahkan dan guhkes áigái. Dušše ovcci proseantta badjel 70-jáhksaččain dadje ahte borret fálesbierggu dávjá.

– Eambbo norgalaččat beroštit sihke elliidčálggus ja ahte buorebut várjalit meahcceelliid. Politihkkarát eai beroš eanetlogu dáhtus máŋgga áššis mat gusket elliide ja lundui, ja čuvvot ealáhusa beroštumi. Norga lea šaddan riikan gos meahcceelliin lea heajut suodjalus buohtastahttojuvvon máilmmiin min birra, ja eanaš norgalaččat eai liiko dan ovdáneapmái. Dan berre Ovddádusbellodat fuomášit, dadjá NOAH jođiheaddji ja šibitdoavttir Siri Martinsen.

-Almmuhus-