NOAH bovdii álbmotčalmmusteapmái doarjun dihte borasspiriid. Badjel 7000 olbmo ledje čoahkkanan doarjut gumppiid, čállá NOAH preassadieđáhusas.
NOAH logai sullii 6000 olbmo geat ledje čoahkkanan Stuorradikki olggobeallái, dasa lassin ledje sullii 1000 olbmo čoahkkanan eará gávpogiidda.
– NOAH lea ilus go nu ollu olbmot dorjot áitojuvvon boraspiriid. Go Stuorradikki olggobeallái čoahkkanit nie ollu olbmot doarjun dihte boraspiriid, de mii sávvat ahte politihkkárat eai divtte stivret ealáhusberoštumiid mat háliidit geahpedit boraspirelogu, čállá NOAH jođiheaddji Siri Martinsen preassadieđáhusas.
Apealladoallit ledje ovdamearkka dihte jussprofessor Mads Andenæs, gii maid lea NOAH advokáhtta, birasorganisašuvnnat ja Sosialisttalaš Gurutbellodaga Arne Nævra.
– Mii oaidnit dál ahte eanas olbmot Norggas háliidit gumppe ja eará boraspiriid luonddus. Lea dehálaš ahte politihkkárat muitet šiehtadallamiin ahte eanas norgalaččat eai hálit leat heajos ovdamearkan muđui máilbmái, čállá Martinsen.
