Kárášjoga Niitohárjái ledje ollu olbmot čoahkkanan go Kárášjoga 10. luohká oahppit lágidedje Sámi álbmotbeaivvi doaluid ja vuvde árbevirolaš mállásiid.
Go Kárášjoga 10. luohkká lágidii Sámi álbmotbeaivvi doaluid Niittohárjjis, de eai lean báljo čohkkánsajit go nu ollu olbmot ledje čoahkkanan.
10. luohkká lei ráhkadan buori prográmma ja sis ledje sihke stohkosat mánáide, «Kahoot!» nammasaš speallu, ja sátnejođiheaddji sártnui álbmogii.
Vuolgime mátkkoštit
Guokte oahppi, geaiguin Ávvir humadii, leaba Sandra Biti ja Sánken Ailu Anti. Soai válddiiga mávssu go olbmot oste mállásiid ja gáhkuid. Oahppiguovttos muitaleigga ahte sii leat nuppes jo lágideamen álbmotbeaivvi doaluid ja ahte sii leat čoaggime ruđa go áiggoše vuolgit mátkkoštit go gerget 10. luohkás.
Lágideaddjeguovttos muitaleaba ahte dakkár lágiidemiin lea ollu bargu ja das čuovvu maid ollu plánenbargu ja ahte sii leat sullii mánu ádjánan buot plánet ja ordnet.
– Dán jagi lei gal ollu álkit go diibmá, ja mii leat maid buoridan doaluid. Lokten dási, mojohallá Sandra Biti.
– Masa dii čoaggibehtet ruđa?
– Mii áigut vuolgit skuvlamátkái, Itáliai, muitala Biti.
– Mii jienasteimmet luohkás, ja de mearrideimmet vuolgit Itáliai, lasiha Anti.
Sullii 100 kg
Per Inge Eira lea váhnen ja okta sis gii lea mielde lágideamen doaluid. Son lea málesruittuid duohken go Ávvir humada suinna.
Eira lohká sin oastán ja ráhkadan eambbo borramuša dán jagi go diibmá ja ahte sii leat vuovdán measta buot.
– Mis lei sullii 60 kilo biergu, 10 kilo ađđamat, 15 kilo njuokčamat ja gumposiid in oba dieđe ge man ollu mis ledje, mii leat sihkkarit vuovdán borramuša máŋgačuođi olbmui jo. Diibmá nohkkuimet borramuššii, dán jagi gal orru juollume buohkaide, muitala váhnen, ja lasiha ahte dat mearkkaša ollu logát luohkkái go nu ollu olbmot bohtet lágidemiide ja gávppašit ja dorjot ohppiid:
– Mun jáhkán ahte sii leat dán guovtti lágideamis čoaggán doarvái ruđa nu ahte besset vuolgit mátkkoštit, dadjá son.
Sátnejođiheaddji sártnui
Kárášjoga sátnejođiheaddji Svein Atle Somby mielas ledje buorit doalut ja son lei rámis go nu ollu olbmot ledje čoahkkanan Niitohárjái.
– Mii Kárášjogas leat čeahpit deaivvadit ja doarjut lágidemiid mat mis leat dáppe, dajai sátnejođiheaddji sártnistis.
– Mis Kárášjogas lea šaddan vierrun čoahkkanit ja ávvudit ovttas, ja herskostallat mállásiin ja gáhkuiguin. Mun lean ilus oaidnit ahte dán jagi ge leat nu oallugat boahtán doaluide. Lea dehálaš čoahkkanit ja nannet oktavuođaid mat mis leat sápmelažžan ja kárášjohkalažžan, sártnui sátnejođiheaddji.
Duppalávvudeapmi
Sátnejođiheaddji muitala ahte dán jagi lágideamis orro leamen eambbo olbmot go ovdal ja ahte dat čájeha ahte Kárášjogas lea stuora beroštupmi dakkár lágiidemiide.
– Munnje lea beaivi identitehta ja kultuvra ja dat mearkkaša hui ollu midjiide, go dat han leat mii ja min beaivi.
Beaivi lea vel eambbo earenoamáš Kárášjoga sátnejođiheaddjái go ollu earáide.
– Juo, dat lea mu riegádanbeaivi maid, nu ahte šaddá dakkár duppalávvudeapmi, ávvudan sihke álbmogiin ja maid ruovttus, bogostallá Svein Atle Somby.
