Vaikko Kjellmann Bensin ja Diesel fitnodat lea vuordán čieža mánu vástádusa Guovdageainnu suohkanis, de ii leat vel oalát heaittihan jurdaga ásahit Guovdageidnui go gullá suohkanis leat mielas dasa.
Vaikko Kjellmann Bensin ja Diesel fitnodat lea vuordán čieža mánu vástádusa Guovdageainnu suohkanis, de ii leat vel oalát heaittihan jurdaga ásahit Guovdageidnui go gullá suohkanis leat mielas dasa.
Mannan čakčageasi lea Frode Kjellmann sádden ohcamuša Guovdageainnu suohkanii ahte áigu ásahit iešhálddašan bensiidna ja diesel bumppiid márkanbáikái, muhto ii leat vel čieža mánus ožžon makkárge vástádusa suohkanis oažžu go álggahit vai ii.
Ii suitte vuordit
Frode Kjellmann lea divrras rusttegiid háhkan, mat leat jurddašuvvon Guovdageainnu álggaheapmái, ja son lea juo ohcan eará suohkaniidda álggahit.
Son lea golahan 2,5 miljovnna ruvnno, iige suitte vuordit.
– Livčče juobe vástádus boahtán ahte oaččun go lobi álggahit vai in, dat livčče maid buorre, ja go lean leamaš oktavuođas suohkaniin de eai orronge nu mielas álggaheapmái.
Šállošahtti
Guovdageainnu sátnejođiheaddji Johan Vasara muitala gullán ášši birra juovllaid áigge juo.
Maŋŋel go medias lea áššis leamaš, lei Altaposten gii álggos čálii ášši birra, de lea Vasara dán vahkku iskan ášši.
– Vurden dat dalle juo áššemeannuduvvo, muhto lea hui šállošahtti go ii leat ožžon makkárge vástádusa.
– Mii gal leat positiivat politihkalaččat visot fitnodat álggahemiide, nu guhka go eai leat makkárge láhkagildosat mat hehttejit. Muhto dasa maid sáhttit iskat sierralobiid jus dárbbašuvvot. Nu ahte min vástádus gal boahtá leahkit positiiva Kjellmanna álggaheapmái, lohká Vasara.
– Man jođánit sáhttá Kjellmann vuordit vástádusa?
– Nu jođánit go vejolaš, vaikko vel ieš šattan čohkkedit dan dihtor ovddabeallái, go mii fertet gal vástidit suohkana bealis, lohká Johan Vasara.
– Álgit go muohta suddá
Go Frode Kjellmann dan gullá, ja dan ahte vástádus boahtá leat positiiva de lea mielas álggahit.
– Ná leaš oaidnit boahtá go vástádus, muhto jus juo jođánit boahtá de gal leat gergosat álgit huksegoahtit go muohta suddá, ja de jáhkkimis leat boaldámušbumppet doaimmas ovdal turistaáigodat álgá.
Hálbbit go eará stašuvnnain
Iešhálddašan boaldámušbumppet leat automáhtalaččat hálbbibut go dain ii ferte olmmoš doaimmahit daid, ja Kjellmann lohká nu movt eará báikkiin lea de lea álo iešhálddašan automáhtat hálbbibut go dábálaš boaldámušstašuvnnain.
Kjellmann maid muitala Guovdageaidnu lea strategalaččat vuogas báiki stuora guorpmebiillaid ektui ja danne lea vuogas sadji.
Son čilge go St1 ostii Shell Norggas, de fuomášedje sis ledje beare unnán báikkit davvin.
Livččii leamaš buore dilli
Guovdageaidnulaš Håkon Isak Vars lea sosiála mediai bokte moaitán suohkana njoazes áššemeannudeami, ja lohkán dohkkemeahttumin suohkana bealis go badjel jahkebeallái eai leat vástidan.
Go dál gullá ahte suohkan áigu vástidit Kjellmanna, de lohká dan buorren, muhto:
– Lea oba heitot go suohkan easka de áigu vástidit go media váldá oktavuođa, go sis livččii leamaš buorre dilli dan čieža mánus vástidit.
Ii daddjon nuppes seamma gierdevaš
Vars lohká lea maid buorre go Kjellmann lea nu gierdevaš, muhto ii leat daddjon nuppes eará olmmoš soaitá leahkit lihka gierdevaš.
– Suohkan gal berre álgit čuovvut hálddahuslága ja berre čavget iežaset rutiinnaid mii guoská áššemeannudan áigemeriide, lohká Håkon Isak Vars.
