-Almmuhus-
OĐĐASATNjoaros alccet ATV

Njoaros alccet ATV

-

-

Beakkán Guovdageainnu heargevuoddjinjoavku, Team Nils Jøran, leat mearridan lágidt dán čavčča njoarostangilvvu gos ATV galgá leat vuoitun.

Sii leat áŋgirat gilvvohallat herggiiguin, ja maid buorit njoarostit.

Mannan vahkkoloahpa šattaiga ge vieljašguovttos Mikkel Andreas Eira ja John Inge Eira nubbin ja viđádin Taigafestivála suohpangiehta njoarostangilvvus, gos lei ATV vuoitun.

 

Dál sii áigot ieža lágidit seammalágan njoarostangilvvu Guovdageidnui čakča- ja golggotmánu mánnomolsašumis.

– Mii leat mearridan stivrras ahte galgá lágiduvvot seamma vahkkoloahpa go «Viddafestivála» dáppe Guovdageainnus, nammalassi álgo golggotmánu, muitala Team njunuš, Mikkel Andreas Eira Ávvirii.

Eira lea mearridan gilvvut galget leat váhkkoloahpa golggotmánu 1. ja 2. beaivvi dán jagi.

 

Ii ovdal Norggas

Eira muitala ahte dakkár njoarostangilvu ii leat goassege Norggas lágiduvvon go maid sii áigot dál dahkat.

 

Son mieđiha ahte sii leat fuomášan lágidit gilvvu go ieža leat leamašan Taigafestivala njoarostangilvvus, ja oaidnán man gelddolaš dat lea.

 

– Mis leat juo alddiineamet diekkár rusttegat gos bidjá čoarvvi johttit, nu ahte mii leat gergosat lágidit, lohká Eira.

 

Vuordá 100 oasseváldi

Eira vuordá 100 oasseváldi gilvvuide, ja čilge manin son dan jáhkká.

 

– Ii leat eambbo gávcci mehter duohken dat maid njoarosta, nu ahte buohkain galgá vejolašvuohta darvehit álkit, lohpida son.

 

Searveluohkát

Eira muitala ahte buohkat servet seamma luohkkái.

 

– Nissonolbmot maid seamma luohkkái go dievddut, dušše besset vel mehtera lagabus njoarostit go dievddut, muitala Eira manin maid jáhkká olu oasseváldit searvat, ja lasiha vel:

 

– Ja diehttelasat vel go ATV lea vuoitun, lohká oaváris njoarostangilvvu lágideaddji Mikkel Andreas Eira vel loahpas.

-Almmuhus-