Badjelaš 40-jahkásaš dievdu lea váldon gitta go geahččalii cahkkehit Čáhcesullo politiijastašuvnna disdaga beaivet.
Dáhpáhus lei ovdalaš diibmu 11 disdaga Čáhcesullos.
Dievdu njoarai bensiinna láhttái ja eará diŋggaid njeaiga Čáhcesullo politiijastašuvnna boađáhagas, ja dieđihii ahte son áigu cahkkehit stašuvnna.
Váldui jođánit gitta
Stašuvnna bargit reagerejedje jođánit ja politiijat válde gitta dievddu ovdal go nagodii cahkkehit stašuvnna dahje roasmmehuhttit ovttage.
Dievdu lea politiijaid hálddus dál, ja sii áigot su formálalaččat dutkat.
Doavttir galgá maid árvvoštallat su dearvvašvuođadili, boahtá ovdan preassadieđáhusas man Finnmárkku politiijaguovlu lea sádden.
Dievdu lea dieđihan ahte son áiggui billistit politiijaid ovddas. Ii leat mihkkege mii čájeha ahte dagut leat terrordagut.
– Dievdu, gii lea olgoriikkalaš, lea oahpis politiijaide ovdalaččas, ja lea ovdal maid dubmejuvvon áitagiid dihte, dieđiha Finnmárkku Politiijaguovlu preassadieđáhusas.
Čáhcesullo politiijain lea buoret gearggusvuohta dál, ja sis leat vearjjut maŋŋel dáhpáhusa. Politiijastašuvnna boađáhat ja dustehat leat gaskaboddosaččat giddejuvvon dál, dieđiha Finnmárkku Politiijaguovlu.
