-Almmuhus-
OĐĐASATNjeiddii vuosttaš ealgga

Njeiddii vuosttaš ealgga

-

-

Vaikko ii orronge fávdnádis bivdodálki, de goitge šattai nu ahte Morten Johansen bážii vuosttaš ealgga dán jagáš bivddus.

 Guovdageaidnulaš Morten Johansen lea hárjánan ealgabivdi gii lea ollu jagiid bivdán.

Son lea dál fárus ealgabivdojoavkkus mii lea bivddus Sáivvuomis, Guovdageainnu davábealde.

Su bivdojoavku ledjege geat dán jagaš bivddus njeide vuosttaš ealgga, ja leige Johansen gii bážii vuotnjala, ikte duorastaga diibmu 16.00.

 

Searvva Ávvira ealgabivdogilvui!

 

Ealga álggos ballái

Johansen muitala go ollejedje bivdobáikái ovddit beaivvi, de lei hui dálki, garra biegga, eaige sáhttán cegget goađi alážii gosa ledje jurddašan.

– Vuosttaš bivdobeaivvi iige lean fávdnádis dálki iige orron firteme, go lei arvi ja mierká. Muhto de firtii beaivái ja mii vulggiimet vázzit. Mii oinniimet ealgga álggos, muhto oainnahalaimet dasa ja dat ballái. De maŋŋelaš vulgen beatnagiin vázzit eará guvlui ja fáhkkestaga bođii fas ealgga ja dán háve manai buorebut ja nu mun báhčen dan, muitala son.

(Ášši joatká gova vuolábealde)


Morten Johansen govvejuvvon ealgabivddus muhtin jagiid áigi. Priváhta govva.

Ožžon liigeealli

Go Johansena bivdojoavku lea báhčán eari, de leat sii ohcan ja ožžon liigeealli báhčit.

Guovdageainnu davábealde leat bidjon golbma liigeealli ja dain oažžuge bivdojoavku báhčit ovtta ealgga.

– Juo, mii leat ožžon liigeealli báhčit, ja mun leange odne viežžan márkanis olbmo vai leat buohkat bivdojoavkkus mielde go dál galgat gávdnat vel dan liigeealgga, lohká Johansen.

 

Gullan gilvvuid birra

Ávviris leage dán čavčča gilvu ealgabivdiide, masa sáhttet sáddet govaid ealggain maid leat báhčán ja nu oažžut vejolašvuođa vuoitit vuoittuid.

Johansen lohká gullan dán gilvvu birra, muhto ii leat vel searvan gilvui.

– Mun in leat vel ollen jurddašit áiggun go searvat, dan ferten oaidnit maid dagan, lohká son.

 

Golbma báhččon

Bearjadaga diibmu 11.00 rádjái ledje dieđihuvvon golbma ealgga báhččon.

Okta Guovdageainnus ja guokte Kárášjogas, Jalgesváris ja Váljogas.

Guovdageainnus ja Kárášjogas álggii ealgabivdu ikte, čakčamánu 1. beaivvi, ja bistá dán mánu lohppii.

 

 

 

 

 

-Almmuhus-