Njeallje proseantta buot bargiin vásihedje sávakeahtes seksualálaš fuomášumi bargosajis 2016:s. Buohccidivššárat leat bargit geat dávjjimusat vásihedje dan.
Njeallje proseantta buot bargiin vásihedje sávakeahtes seksualálaš fuomášumi bargosajis 2016:s. Buohccidivššárat leat bargit geat dávjjimusat vásihedje dan.
#Metoo-kampánja lea váldán stuora saji mediain maŋemus mánuid. Dievddut ja nissonat geat botkejedje jávohisvuođa seksuálalaš loavkideami birra ja álggahedje kampánja, ožžo ovdal juovllaid Time Magazine bálkkašumi «dán jagi persovdnan». Dát fáddá lea maid boktán politihkalaš beroštumi Golden Globe bálkkašumis. Norggas lea maid #Metoo boktán almmolaš digaštallama mannan čavčča, sihke politihkas ja kultureallimis.
Eanemusat nissonat
– SSB logut muitalit ahte lea stuora erohus sohkabeliid gaskkas, geat vásihit eanemus sávakeahtes seksuálalaš fuomášumi bargosajis. Ođđaseamos logut leat Eallindiliguorahallamis bargobirrasa birra 2016:s, ja dalle muitalii njeallje proseantta bargiin ahte sii vásihedje sávakeahtes seksuálalaš fuomášumi, kommentára dahje sullasaš dáhpáhusa oktii mánus dahje dávjjit, čilge ráđđeaddi Mathias Killengreen Revold preassadieđáhusas.
– Čieža proseantta nissoniin vástidedje ahte ledje vásihan sávakeahtes seksuálalaš fuomášumi, ja guokte proseantta dievdduin vástidedje ledje vásihan dan. 13 proseantta nissoniin gaskkal 18 ja 24 jagiin lohke vásihan sávakeahtes seksuálalaš fuomášumi, muitala Revold.
Erohusat virggiid gaskkas
Leat maid čielga erohusat virggiid ja ealáhusaid gaskkas.
– Guossohan- ja idjadanfitnodagain vástidedje 22 proseantta nissoniin vásihan sávakeahtes seksuálalaš fuomášumi, ja 14 proseantta go geahččá goappašat sohkabeliid dán ealáhusas, muitala Revold.
Buohccidivššárat vásihit buot eanemusat sávakeahtes seksuálalaš fuomášumi. Dat lohku lea 17 proseantta.
Unnimus hoavddain
– 2016:s jearaimet vuosttaš geardde geat leat sii geat dahket dakkár daguid. Dalle vástidedje 79 proseantta ahte ledje kundarat, klieanttat, oahppit ja earát geat eai lean seamma bargosajis barggus, geat dahke dakkár daguid, muitala Revold.
20 proseantta sis geat vástidedje, lohke vásihan sávakeahtes seksuálalaš fuomášumi bargoustibis, ja guhtta proseantta vásihii dan hoavddas.
Unnán dievddut geat vásihit
Dievddut gaskkal 18 ja 24 jagis vásihedje njeallje proseantta sávakeahtes seksuálalaš fuomášumi 2016:s. Eará agiin lea lohku ovtta ja guokte proseantta leamaš čađat 1980-logu loahpageahčen, čállá SSB neahttasiiddus.
