Njeallje olbmo heavvanedje njukčamánus, Buot heavvaneamit dáhpáhuvve go ledje fatnasis. Redningsselskapet searvvi heavvananstatistihkka čájeha ahte oktiibuot 12 olbmo heavvanedje dán jagi vuosttaš golmma mánus. Buohkat ledje almmáiolbmot.
Eaktodáhtolaš heavvananeastadeaddji nammasaš Redningsselskapet searvi dieđiha preassadieđáhusas ahte njukčamánus heavvanedje njeallje albmá merrii. Buohkat ledje 60–70-jahkásaš albmát.
Mánu álggus heavvanii badjelaš 70-jahkásaš go gahčai merrii guolástantroláris olggobealde Sáččá Romssa ja Finnmárkku fylkkas. Nubbi almmái, badjelaš 70-jahkásaš navdo heavvanan Blomvåg nammasaš báikkis Øygarden guovllus. Almmái ii gávdnon.
Nordlánddas Vestfjorden vuonas gávdnui muhtin 60-jahkásaš almmái loahpageahčen njukčamánu heavvanan merrii. Son lei sádden «mayday» heahtedieđu go čáhci lei deavdimin fatnasa. Mánu maŋimuš beaivvi heavvanii badjelaš 70-jahkásaš almmái Tjøme báikkis Vestfold ja Telemark fylkkas go njalahasttii ja čeasai merrii, lahka iežas fatnasa.
Guovttis davimus fylkkas
Romssa ja Finnmárkku fylkkas leat guovttis duššan, okta olmmoš lea heavvanan fylkkain Nordlánddas, Vestlánddas ja Innlándás, Trøndelágas, Møre ja Romsdalas, Vestfold ja Telemárkkus ja Vikenis. Dan dieđiha Redningsselskapet heavvaneami fágasuorggi jođiheaddji Tanja Krangnes preassadieđáhusas. Eambbo dieđuid gávdná dás rs.no/drukning ja Drukningstall mars 2021
