Ruoŧa Sámediggi lea ožžon njeallje miljovnna ruvnna Ruoŧa kulturdepartemeanttas koronadoarjjan sámi kultuvrii. Doarjja galgá juolluduvvot sámi kulturbargiide geat leat massán sisaboađu pandemiija geažil.
Ruoŧa kulturdepartemeanta lea juolludan 881 miljovnna Ruoŧa kulturráđđái maid galget juolludit kulturbargiide. Ruoŧa Sámediggi lea maid ohcan liige koronadoarjaga sámi kultuvrii. Maŋemus ohcanáigi lea dál leamaš, ja 48 kulturbargi ja maid ásahusat Ruoŧa bealde leat dál ohcan koronadoarjaga. Nu dieđiha Sámeradio ja SVT Sápmi.
Eanemus koronadoarjaga lea dáiddár Niklas Blindh ohcan. Son ohcá miljovdnabeale ruvnna Ruoŧa Sámedikki koronadoarjja ruđain. Giron Sámi Teáhter ohcá 320 916 ruvnna ja Erica Huuva silba badjelaš 200 000 ruvnna.
Eará dovddus sámi kulturbargit nugo duojárat, artisttat ja eará ohcet maid doarjaga, nugo Sara Ajnnak, Simon Marainen, Lars Anders Kuhmunen ja Katarina Barruk. Geahča buot ohcciid dás.
Sámedikki kulturlávdegoddi mearrida juovlamánus geat ožžot oasi doarjagis.
