Bivdit gávnnahalle bahčán njeallje ealgga lobiheamet, rihkkon bivdoáiggiid, rihkkon vearjolága ja vuodján lobiheamet.
Borgemánu 24. beaivvi rájes leat Boazopolitiijat dárkkistan 116 ealgabivdi ja 31 smávvafuođđubivdi Finnmárkkus, dieđihit politiijat preassadieđáhusas.
Dáin iskamiin gávnnahalle bivdit iešguđet láhkarihkkumiin. Politiijat leat álggahan njeallje ášši go gávdne ealggaid mat leat lobiheamet báhččon. Dat áššit ledje Álttás, Fálesnuoris ja Guovdageainnus.
Lobihis vuodjin ja vearjovurkkodeapmi
Dasa lassin leaba guokte bivdi váidojuvvon go galgaba bivdán ovdal go bivdoáigi álggii vuosttaš beaivvi čakčamánus. Njealjis leat ges váidojuvvon lobiheamet vuodján mohtorfievrruiguin. Golmmas galget fas rihkkon vearjolága go eai vurkkodan vearjjuid lágalaččat.
Eai gávdnan buohkaid ságaide
Politiijat muitalit sii leat leamaš dárkkisteame birrasiid 25-30 ealgabivdoguovllu, muhto eai lean buot bivdoguovlluin olbmot go sii fitne doppe. Dárkkisteamit ledje eanas Kárášjogas ja Guovdageainnus, muhto maiddái Deanus, Unjárggas, Fálesnuoris, Porsáŋggus ja Álttás.
