Gárggoluobbalis lea olles albbasbearáš leamaš ealu siste, ja goddán bohcco jur gili siste.
Gárggoluobbalis lea olles albbasbearáš leamaš ealu siste, ja goddán bohcco jur gili siste.
Gárggoluobbalis leat leamaš njeallje albasa Johan Mikkel Mathisen Gaup siiddas ealu siste, ja goddán bohcco dušše moadde čuođi mehtera eret su dálveviesus. Gaup muitala ikte fuomášan jápmán bohcco davábealde riikageainnu 92, buohta Gárggoluoppal šilta.
– Mun oidnen ahte lei albbas goddán, ja vuhtten ahte ledje moadde albasa. Mun dieđan ahte albasat leat dakkárat mat vázzet maŋŋálagaid ja dulbot seamma luottaid, ja časkilin ja vuhtten ahte leat eambbo go dušše okta.
Šaddan jahkásaš váttisvuohtan
De dieđihii ge son Stáhta luonddubearráigehččui, geat ovttatmanos vuoruhedje boahtit iskat.
– Stáhta luonddubearráigeahčču Henrik Eira bođii ikte juo ja guorai albasiid, ja sáhtii muitalit ahte ledje njeallje albasa leamaš ealu siste. Diibmá lei maid albbasbearáš min ealu siste ja godde bohcco, ja ii leat dieđusge nu erenoamáš ahte albbas goddá bohcco, muhto go jahkásaččat lea albbasbearáš de čájeha dat ahte leat laskkan, lohká son.
(Ášši joatká gova vuolábealde)
Ávvira vuorkágovva
Ii vel báhčinlobi ohcan
Gaup lei ohcan boraspirebuhtadasa Fylkkamánnis, muhto ii ožžon dan maid lei ohcan albbasvahága dihte, ja danne váiddi dan, muhto eai sii eai jáhke albbas goddá nu ollu. Son ii leat vel mearridan ohcago báhčinlobi.
– Mii leat ovdal Fylkkamánnis ohcan ja ožžon báhčinlobi albasii, muhto in jáhke oažžut jus juo lei nu ahte dat guđđe guovllu, lohká Gaup.
Goddán moatti siiddas
Stáhta luonddubearráigeahču Henrik Eira duođašta ahte sii leat vuohttán njeallje albasa, njiŋŋelas mas golbma čivgga.
– Dat ledje goddán Gaup siiddas ovtta bohcco, ja mii leat maid ožžon dieđuid ránnjásiiddain ahte albbas lea goddán doppe bohccuid. Mii registreret albasiid boazodoalu dálveeatnamiin juohke jagi, ja go lea bearáš de lea dat territoriála, mii mearkkaša ahte lea orru albbas.
(Ášši joatká gova vuolábealde)
Govven: Henrik Eira, SNO
Eira muitala jus fuomáša ja dieđiha albbasbearraša mii ii leat ovdal registrerejuvvon, de bálkkaša Fylkkamánni dan 15000 ruvnnain.
– Albbas lea dakkár mii njukčamánus gevre čivggaid mannat, ja dan rádjai sáhttet olbmot dieđihit jus fuomášit albbas čivgama. Mii geahččat 4,5 miilla sturrosaš rieggá siskkobealde go registreret ođđa albasiid, ja jus lea dan siste de lea jáhkkimis dihto albbasbearáš. Albasiid maid Gaup dál lea dieđihan eai leat registrerejuvvon ovdal, nu ahte jáhkkimis oažžu son bálkkášeami, lohká Eira.
