-Almmuhus-
OĐĐASATNjealjis sáhko­halle go vudje dálve­rieggáiguin

Njealjis sáhko­halle go vudje dálve­rieggáiguin

-

-

Stáda geaidnodoaimmahat lea ovttas oarje-finnmárkku olgodárkustan joavkkuin čađahan dárkkistemiid johtolatfievrruiguin vahku 28, suoidnemánu 6.beaivvis gitta 10.beaivái. 

Stáda geaidnodoaimmahat lea dárkkistan sihke lossafievrruid ja gehppesfievrruid Deanus, Báhcavuonas, Davvesiiddas, Bearalvákkis, Várggáhis, Čáhcesullos ja Unjárggas. 

Duđavaččat bohtosiiguin

Eanas fievrrut ledje ortnegis go dárkkistedje sin. Stáda geaidnodoaimmahat atti 15 vuodjingildosa vuddjiide. Stáda geaidnodoaimmahaga bargi, Tor Wikan, lohka sin hui duđavažžan bohtosiiguin. 

–Čájehuvvo ahte olbmot doalahit njuolggadusaid ja fievrruid ortnegiin. Muhto dieđusge lea álot nu ahte muhtimis váilu juoga, lohka Wikan. 

Daid sivas ožžo olbmot vuodjingildosa: 

– Oinnii hejot vuojidettiin, vuoddji oaččui guokte vuodjingildosa guovtti diimmus ja váidui. 

– Váillui BE-klássa vuodjinlohpi

– Ii lean sihkkarastán gálvvu

– Registrerenreaidu mii goziha vuodjinfievrru ja vuoddji aktivitehta ii lean dohkálaš, ja dan dihte go dakkár reaidu váillui

– Beare lossa guorbmi, geasehedje stuorit goallosvovnna go lea lohpi

Muđui adde sii 25 teknihkalaš gildosa go fievrrus váillui juoga. Wikan muitala ahte ledje 4 vuoddji mat eai lean muitán lonuhit geassedeahkaide. 

– Ledje njeallje vuoddji mat ledje vajálduhtten lonuhit dálvedeahkaid eret. Dál ii leat lohpi vuodjit dálvedeahkaiguin geasset, ja sii ožžo sáhku, muitala Wikan. 

Olbmot galget dovdat oadjebasvuođa 

Stáda geaidnodoaimmahat doallá bearráigeahču dárkkistan dihte johtolatsihkarvuođa. 

– Mis lea sierra joavku mii doallá olgodárkkistemiid ja isket fievrruid mat vánddardit. Buohkat galget vánddardit oadjebasat norgga luottain, loahpaha son. 

-Almmuhus-