Koronaroasu dihtii plánejit hui olu norgalaččat geasseluomu Norggas. Varas oaiviliskkadeamis vástidit njealjis logi olbmos ahte áigot leat eambbo barttas dán jagi go ovdal. Dat mearkkaša ahte birrasii 200 000 bartta ja astuáiggedálu Norggas geavahuvvojit eambbo.
– Koronaroasu dihtii navdit mii ahte olbmot geavahišgohtet iežaset barttaid eambbo dán geasi. Mii ballat danne ahte bartabuollimat sáhttet lassánit. Olu barttain Norggas eai leat kránnját lahka ja de sáhttá šaddat hui hástaleaddji dilli báikkálaš buollinčáskadeddjiide joavdat áigemunil, lohká dáhkádusfitnodaga Tryg Forsikring gulahallanneavvu, Torbjørn Brandeggen preassadieđáhusas.
Hárve isket jumána ja váilot rusttegat
Oaiviliskkadeamis, man YouGov čađahii Norsk brannvernforening ja Tryg Forsikring ovddas, vástidedje 24 proseantta ahte sii dárkkistit suovvajuma juohke háve go bohtet bartii. Norsk brannvernforening hálddahuslaš direktevra, Rolf Søtorp, deattuha ahte juohke barttas galgá doaibmi suovvajupma ja dollačáskadanrusttegat.
Stastihkalaš guovddášdoaimmahat, SSB, loguid mielde leat 500 000 bartta ja astoáigedálu Norggas. Ovddeš iskkadeamit čájehit ahte 15 000 barttas váilot dollačáskadanrusttegat, 8000 barttas váilu suovvajupma ja 30 000 bartaeaiggáda leat vásihan buollima maŋimuš logi jagis.
Dáhkádusfitnodaga rávvagat
– Dárkkis barttas ahte suovvajupma doaibmá, molsso báhttera, ále guođe buolli kintala, ále goikat uvnna alde biktasiid, vurke gunaid nu ahte eai buollá, jáddat elrávdnjerusttegiid go guođát bartta. Dárkkis gássarusttegiid dávjá, bija gássajuma, fuolat ahte barttas leat doarvái dollačáskadanrusttegat, dárkkis suovvabohcci ja uvnna, ruhtte suovvabohcci, čális bartta GPS-koordináhtaid vai lea álkit buollinčáskadanásahussii ja dearvvašvuođaásahussii dohko dádjadit, čállá dáhkádusfitnodat.
