Davvi-Ruoŧa regoivdna dieđiha ahte njeallje olbmo leat jápmán covid-19 dávdii Norrbottenis.
Dán vahku leat oktiibuot logi olbmo jápmán koronadávdii Davvi-Ruoŧas. Dál leat oktiibuot 130 olbmo jápman giđa rájes leanas. 111 olbmui lea njommon dávda ja dál lea 6919 olbmos duođastuvvon covid-19 giđa rájes. Bearjadaga leat davimuš Ruoŧas 23 olbmo divššus buohcceviesuin ja golmmas leat intensiivadivššus.
Olles Ruoŧas lea oktiibuot 357 466 olbmos duođastuvvon dávda ja duorastaga ledje 7893 jápmán koronadávdii.
Moaitámus
Ruoŧa koronakommišuvna lea moaitán Ruoŧa ráđđehusa ja oaivvilda ahte sii eai leat nagodan suddjet vuorraset olbmuid Ruoŧas pandemiijaáiggis. NTB ođasgáldui cealká Ruoŧa stádaministtar Stefan Löfven ahte lea ráđđehusa ovddasvástádus.
– Lea ráđđehusa ja maid ovdalaš ráđđehusaid sivva go boarrásiid dikšu ii lean gearggus pandemiijai. Lea olu maid livččii sáhttán dahkat eará ládje ja mii livččiimet sáhttán rievdadit.
