-Almmuhus-
OĐĐASATNjealjis galget verrošan oadjoruđaiguin Guovdageainnus

Njealjis galget verrošan oadjoruđaiguin Guovdageainnus

-

-

Boahtte čavčča mielde galgá Sis-Finnmárkku diggegoddi meannudit njeallje ášši main lea sáhka oadjoruđaidverrošeamis mii galgá dáhpáhuvvan Guovdageainnus. Golmmas dáin galget oktiibuot verrošan goasii miljovnna ovddas.

Boahtte čavčča mielde galgá Sis-Finnmárkku diggegoddi meannudit njeallje ášši main lea sáhka oadjoruđaidverrošeamis. Dát lea visot dáhpáhuvvan Guovdageainnus. Golbma almmáiolbmo ja okta nisu dat galget diggegotti ovdii čilget dáid birra.

 

2014:s galgá dáhpáhuvvan

Borgemánu 30. beaivvi meannuda Sis-Finnmárkku diggegoddi guokte álgoášši. Álggos álget áššiin mas muhtin viđátlot-jahkásaš almmái lea áššáskuhtton go galgá leat guovtti áigodagas 2014:s ja 2015:s verrošan oadjoruđaiguin.

Dan guovtti áigodagas galgá son addán elektrovnnalaš dieđihankoarttaid NAV:i, main lea leamaš almmuhan ahte lea bargan 120 diimmu, vaikke galgá leat bargan 603,5 diimmu.

Dieđihankoartta dieđuid geažil lea NAV de máksán 106 543 ruvnnu eambbo go lei galgat, dán albmái. Áššáskuhtti eiseválddit gáibidit albmá buhtadit dan ovddas.

 

Čieža jagi dassái

Maŋŋil seamma beaivvi, de meannuda diggegoddi dan nuppi sullasaš ášši. Das lea ges muhtin guđátlot-jahkásaš almmái áššáskuhtton go lea cuoŋománus 2009 gitta geassemánnui 2013:i dieđihan elektrovnnalaš dieđihankoarttaid bokte NAV:i, ahte lea bargan oktiibuot 74 diimmu.

Almmái galgá dattetge bargan oktiibuot 2 259 diimmu. Dáid dieđuid geažil lea NAV máksán 375 397 ruvnno eambbo go lei galgat, dán albmái.

 

450 duháha ovddas galgá verrošan

Borgemánu 31. beaivvi meannuda Sis-Finnmárkku diggegoddi dan goalmmát ášši. Das lea muhtin viđátlot-jahkásaš nisu áššáskuhtton go galgá njukčamánus 2010:s gitta cuoŋománnui 2012:i sádden elektrovnnalaš dieđihankoarttaid NAV:i, mas lea almmuhan ahte leat bargan 1 227 diimmu.

Nisu galgá leat bargan 4 570,5 diimmu, ja mearkkaša ahte galgá oktiibuot 3 345,5 eambbo bargan go lea dieđihan. NAV galgá máksán 449 741 ruvnno eambbo nissonii go lei galgat.

Oktiibuot galget diet golmmas verrošan 931 000 ruvnno ovddas.

 

NAV lei galgat árabut fuomášit

Njealját ášši lea plánejuvvon čakčamánu 9. beaivái, dan áššis ii leat áššáskuhttin vuos gárvvis, muhto lea sáhka muhtin dievddus guhte maid galgá verrošan vearroruđaiguin. Ávviris eai leat dieđut das man olu ruđas dás lea sáhka.

Advokáhtta Trond Pedersen Biti bealušta buot njealljása dikkis. Biti ii hálit olus kommenteret áššiid, muhto muitala ahte áššit leat veaháš iešguđetláganat.

– Okta dain áššáskuhtton olbmuin gal mieđiha ahte lea boasttu dieđuid almmuhan, okta eará ges oaivvilda ahte NAV lei galgat dán fuomášit árabut, čilge Biti oanehaččat SMS-dieđu bokte Ávvirii.

 

Eai leat mearridan ráŋggáštusárvalusa

Politiijaadvokáhtta Hanne Bernhardsen ovddasta áššáskuhtti eiseválddiid dan golbma álgoáššis mat galget dikki ovdii. Son lohká leat menddo árrat kommenteret maidege dáid áššiid dáfus.

– Mii fertet vuordit dassái go ášši lea dikkis, ja duođaštusat leat ovdanbukton. Dan maŋŋil de oaidnit makkár ráŋggáštusa árvalat, čilge Bernhardsen.

Ráŋggáštusrámma roavva verrošemiid ovddas lea gitta guđa jahkái giddagasas, muhtin oassi dán áiggis sáhttá maid buhtaduvvot sáhkuid bokte.

 

Ii kommentere

Ernst Pettersen galgá ovddastit áššáskuhtti eiseválddiid dan njealját áššis, man Sis-Finnmárkku diggegoddi plána mielde galgá meannudit čakčamánu 9. beaivvi.

Son ii loga sáhttit kommenteret áššis maidege go áššáskuhttima diehtu ii leat vel addon.

 

 

 

-Almmuhus-