Sihke diibmá ja dán jagi dušše njealje olbmo johtolagas guovvamánus. Dán rádjái jagis leat čieža olbmo duššan johtolagas.
Dán čájehit Stáda Geaidnodoaimmahat logut. Eai goassege ovdal leat Norggas ná unnán olbmot duššan johtolagas álggus jagis.
Jagi 2012:s dušše 16 olbmo johtolagas guovvamánus, ja dán rádjái jagis ledje 31 olbmo duššan 2012:s.
– Leat goitge beare oallugat geat duššet, muhto čájeha goitge ahte systemáhtalaš ovttasbargu mii guoská johtolatsihkarvuhtii ábuha, lohká Stáda Geaidnodoaimmahaga johtolatsihkarvuođa jođiheaddji Guro Ranes.
Dievdoolbmot duššan
Dássážii jagis leat dušše dievdoolbmot duššan johtolagas.
Guovvamánus dušše guovttis Vestfold ja Telemárkku fylkkas, okta Rogalánddas ja okta Nordlánddas.
Rogalándda (3) ja Vestfold ja Telemárkku (2) fylkkain leamašan eanemus duššanlihkohisvuođat dán jagi. Innlandet ja Nordlándda fylkkain lea okta olmmoš duššan goabbat fylkkain.
Bealli dán jagi duššanlihkohisvuođat leat geavvan go biillat leat beaškkehan oktii.
