Gáivuona sátnejođiheaddji Bernt Lyngstad háliida joatkit doaimmas ja lea ge nominerejuvvon Bargiidbellodaga njunnošii.
Njukčamánu 31. beaivvi dievvá áigemearri dieđihit nominašuvdnalisttuid suohkan- ja fylkkadiggeválggaide.
Gáivuona Bargiidbellodat lea válljen dálá sátnejođiheaddji Bernt Lyngstada bajimussii.
– Mun jurddašan ahte njeallje jagi lea menddo oanehis áigi jus áigu buot plánaid čađahit ja áigumušaid olahit. Danin háliidan joatkit sátnejođiheaddjin jus fal jienasteaddjit dorjot dán, lohká Lyngstad.
Gelddolaš, muhto gáibideaddji
Bernt Lyngstad muittaša 2019 válgagičču. Su mielas lei dát gelddolaš ja dál illuda dassážii go 2023 suohkanválggaid válgagižžu čievččestuvvo johtui.
– Dalle beassá deaivvadit olbmuiguin, hállat politihka birra ja gullat mii jienasteddjiid áŋgiruššá. Válgagižžu lea hui gelddolaš, muhto maiddái gáibideaddji, lohká Lyngstad ja muitala ahte beaivvit sáhttet šaddat oalle guhkit válgagiččus.
– Gáivuona Bargiidbellodagas lea vierrun galledit buot suohkana 900 dállodálu válgagiččus. Dalle šaddet guhkes beaivvit go galggat dábálaš barggu maid doaimmahit. Seammás illudan dása sakka go lea somá politihkket.
Ii šaddan nu go jáhkii
Bernt Lyngstad lea 51 jagi boaris, son lea eret Biertaváris, muhto ássá Olmmáivákkis. Son lea náitalan ja lea njeallje máná áhčči. Ovdal go čohkkedii sátnejođiheaddji stullui, de barggai Norgga čázádat- ja energiijadirektoráhta uđasossodaga seniorinšenevran.
Lyngstad válljejuvvui vuosttaš gearddi Gáivuona suohkanstivrii 2015:s, ja njeallje jagi maŋŋel šattai sátnejođiheaddjin.
– Sátnejođiheaddjidoaibma ii šaddan nu go ledjen vuordán. Vihtta mánu maŋŋel go konstituerejuvvojin sátnejođiheaddjin, de leavai pandemiija ja servodaga giddejedje masá guovtti jahkái. Buot gáržžiduvvui ja eanaš áigi manai bargat gearggusvuođain ja gulahallamiin. Dat lei lossat ja váivi go suohkanássit jápme pandemiija geažil. Mii leimmet hui erenomáš dilis, muhto jurddašan ahte dát vásáhusat sáhttet ávkin maŋitáiggis, lohká Lyngstad.
Olu olahan
Vaikke pandemiijas ledje stuora váikkuhusat sátnejođiheaddji bargobeaivái, de dovdá Bernt Lyngstad ahte lea olu olahan ovttas Gáivuona suohkanstivrrain.
– Mii leat garrasit bargan suohkanekonomiijain ja dál orro ekonomiijadilli buorráneamen. Mii leat maid Gáivuona suohkana nuppástuhttimin organisašuvdnan. Muđui lea ođđa ássanviessoguovlu fargga sajis, mii leat divodeamen suohkana geainnuid, mii leat nannen dearvvašvuođasuorggi ja Dálusvággái ásahuvvo dán jagi kulturguovddáš mánáid ja nuoraid várás. Dása illudan ja lean dáinna vuoruhemiin hui rámis, lohká son ja joatká.
– Buoremus muitogovva sátnejođiheaddjin leat dattege buot deaivvadeamit báikkálaččaiguin. Olbmuin leat iešguđetlágan historjját muitalit ja muhtin olbmuin lea hástaleaddji dilli. Jus de nákce veahkkin njulget ja buoridit olbmo eallima, de čájehit stuora giitevašvuođa ja dan vásihan hui positiivan.
Šaddan eanet oadjebas
Gáivuona sátnejođiheaddji dadjá ahte loaktá barggus hirbmat bures.
– Guokte álgojagi lei buot hui amas ja mun dárbbašin áiggi hárjánit ollesáigge politihkkára bargui. Dál dovddan oadjebasvuođa ja áiggi mielde lean liikostan dán doibmii. Mun ádden bures ahte soapmásat dadjet sátnejođiheaddjis máilmmi buoremus barggu, dat gal lea duohta, lohká Lyngstad.
Sus leat sihke somás ja váivves muittut maŋimuš jagiid. Mannan geasi vásihii ahte su bellodatustit ja Gáivuona ovddeš sátnejođiheaddji eretvádjolii.
– Mii massiimet Bjørn Inge Mo ja dat čuozai garrasit munnje persovnnalaččat, muhto maiddái olles bellodahkii ja Gáivuona servodahkii.
Bjørn Inge Mo lei Romssa ja Finnmárkku fylkkaráđđejođiheaddji go jámii.
98 proseantta ovttaoaivilvuohta
Bargiidbellodat fidnii gávcci politihkkára Gáivuona suohkanstivrii 2019:s ja ovttas Olgešbellodagain ásahedje eanetlogu. Mannan čavčča guđii Stian Pedersen Bargiidbellodaga ja šattai sorjjasmeahttun áirrasin.
Eanetlohku vai ii, de leat Gáivuona suohkanstivrras eanaš áigge ovttaoaivilis.
– Lean hui rámis go jođihan suohkanstivrra mii bargá Gáivuona buoremusa ovddas. Mis leat olu digaštallamat, muhto gávdnat dávjá oktasaš čovdosiid ja birrasii 98 proseantta áššiin mearriduvvojit ovttajienalaččat. Mun doaivvun ahte ná joatkašuvvá boahtte áigodagas beroškeahttá gii beassá njunnošii, loahpaha Bernt Lyngstad.
Gáivuona Bargiidbellodaga nominašuvdnalistu:
1. Bernt Eirik Isaksen Lyngstad, r. 1971, Olmmáivággi
2. Britt Margrethe Pedersen, r. 1968, Nieidaluokta
3. Arthur Kjelstrup-Olsen, r. 1948, Dálusvággi
4. Lisa Katrine Mo, r. 1992, Olmmáivággi
5. Dagfinn Lyngstad, r. 1976, Biertavárri
6. Sandra Marita Larsen Holm, r. 1988, Dálusvággi
7. Hermund Severin Dalvik, r. 1948, Olmmáivággi
8. Mariell Karlsen Myrseth, r. 1991, Olmmáivággi
9. Villy Ivan Hestdal, r. 1950, Čieŋalluokta
10. Inghild Isaksen Blomstereng, r. 1976, Olmmáivággi
11. Anders Hauan Løvli, r. 1996, Biertavárri
12. Liv Gjertrud Hestdal, r. 1953, Čieŋalluokta
13. Gunnlaug Oppervoll Isaksen, r. 1965, Olmmáivággi
14. Reidar Øivind Pedersen Breivik, r. 1943, Dálusvággi
15. Leena Marie Olsen, r. 1998, Biertavárri
16. Arne Mathisen, r. 1965, Dálusvággi
17. Randi Reiersen Solberg, r. 1951, Biertavárri
18. Arnt Magnus Gamst, r. 1984, Langnes
19. Anette Susanne Lyngmo Seppala, r. 1961, Dážavággi
20. Stein Helge Aalberg, r. 1956, Biertavárri
21. Karin Anbjørg Karlsen, r. 1957, Biertavárri
22. Arnt Ludvik Furubakken, r. 1957, Dálusvággi
