Njállamáddodat lea jávkamin álbmotmeahcis: Luitet 29 njálavielpá Várnjárgii

Oppalaččat Norggas lea njállalohku lassánan 2017:s. Njálla lea klassifiserejuvvon kritihkalaš áitojuvvon nállin.

Leat dokumenterejuvvon 40 beassádaga ja unnimusat 135 indiviida Norggas, diimmá ektui goas ledje 16 beassádaga, dieđiha Birasdirektoráhta.

Guhkimusat davvin gal orru fas sevdnjes áigi njállii.

– Vaikke  leat intensiivvat čuvvon njála guovllus, de leat liikká registrerejuvvon dušše guokte njála Várnjárgas, ja lea golbma jagi áigi go maŋimuš riegáduvvojedje čivggat doppe, čállá direktoráhtta.

Luitet 29 vielpá guvlui

Dat váivves logut bohtet ovdan raporttas «Njálla Norggas 2017», maid  Norgga Luonddudutkaninstituhtta (NINA) lea ráhkadan direktoráhta ovddas. Ovdáneapmi vuorjá.

– Danin luoitit mii 29 čivgga njála šaddadanstašuvnnas Várnjárggas dán dálvvi. Dasa lassin álggahat biebmama  ja ain unnidit ruksesriebanlogu daid lagamuš jagiid, dadjá Birasdirektoráhta ossodatdirektevra Yngve Svarte.

Romssa universitehta lea máŋga jagi čuvvon njállamáddodaga Finnmárkkus. Jáhkku lea ahte njálla ii nagot gilvalit  stuorát ja kievrrat ruksesriebaniin. Danin lea Luonddubearráigeahčču ja báikkálaš bivdit 2005 rájes báhčán 2 700 ruksesriebana guovllus.

Liikká ii leat njállamáddodat lassánan.

– Sivva lea várra go leat unnán sáhpánat, dieđiha Birasdirektoráhtta.

– Kritihkalaš

2011:s lei goddesáhpána bárisjahki, registrerejuvvojedje badjel 20 njála Várnjárggas, muhto dán maŋŋil lea dušše registrerejuvvon okta beassádat mas leat guokte čivgga.

– Boahtte goddesáhpánjahki vurdojuvvo áramusat 2019:s, ja danin lea várra ahte njálla jávká Várnjárggas. Dilálašvuohta orru leat seamma kritihkalaš stuorra osiin Finnmárkkus ja maiddái guovlluin Suomas ja Ruoŧas gos rádjá lea Norgii, muitala Svarte.

Lulli-Norggas leat njállabeassádagat jeavda stuorábut dán jagi go diibmá. Dán jagi beassádagat leat sullii seamma láhkai go 2016:s, muhto eanaš leat Dovrefjellas.

(©NTB)