-Almmuhus-
VALÁŠTALLANNjáhcu bisseha Tour de Snowcross

Njáhcu bisseha Tour de Snowcross

-

-

Kárášjoga mohtorsearvvi jođiheaddji duođašta Tour de Snowcross skohtergilvvut eai šatta.

 – Ii leat nu álki skohtergilvvuid lágidit go diet vilges diŋga mii lea olggobeale stobu suddá lieggagrádain, čaibmá Per Tommy Eideng, guhte jođiha Kárášjoga Mohtorsearvvi.

 

Muohta suddan

Sii galge lágidit ovtta oasi Tour de Snowcross skohtergilvvuin, mat rievtti mielde galge lágiduvvot Álttás, Leavnnjas ja Hammerfeasttas.

 – Go Hammerfeasttas suttai muohta de jerruimet mii lágidit dan oasi mii doppe livčče gálgan, ja mii leimmet miehtan dasa. Muhto dál go muohta lea suddan sihke Álttás ja Leavnnjas ja dat gilvvohallamat leat šluhttejuvvon, de eat lágit dáppe ge daid gilvvuid, čilge Eideng.

 

Váttis hahkat ruhtavuoittuid

Eideng muitala ahte ledje jurddašan liikká lágidit muhtinlágan skohtergilvvuid, muhto dat šattai maid váddása duohkái.

 – Mun lean ieš bávččagahttán čippi, okta eará stivrraláhttu ges maid lea roasmmehuvvan. Nu ii livčče mis eará go okta stivrraláhttu gii lei sáhttit dáinna bargat ja dat lei šaddat menddo olu bargu. Dasa lassin lea maid váttis hahkat ruhtavuoittu gilvvuide, muitala Eideng ja čilge dán áigge leat juste ruhtavuoittuid mat geasuhit skohtercrossvuddjiid gilvvuide searvat.

 – Dát lea divrras valáštallan ja dalle fertejit buori vuoittut. Kárášjoga márkka ii leat nu stuoris ahte nagodat máŋgii oažžut fitnodagaid sponset midjiide vuoittuid, čilge son ja čujuha dasa go mohtorsearvi aittobáliid lea lágidan Kara-X gilvvuid.

 

-Almmuhus-