Politiijat leat ohcamin muhtin nissona Sállanis, gii láhppui go lei vázzintuvrras.
Nisu gii lea láhppon lei golbmasiin ovtta fáru beaivetuvrras Nordsandfjordenii. Go vázziledje ruovttoluotta sullii diibmu 1930 ikte eahkedis, de vulge iešguđet guvlui.
Gaskaijaáigge diibmu 00.30 ožžo politiijat dieđu go nisu ii lean vel joavdan Sállanii, nu mo lei šiehtaduvvon. Maŋimuš go nissoniin lei oktavuohta lei go son lei Nordsandfjordvannet bokte ja dan maŋŋá lea sus jáddan telefovdna.
Heajos dálki
Guovllus lea skoaddu, garra biegga, arvi ja dušše 11 gráda.
Láhppon nisu lea loahpageahčen 50 jagiin, son lea hárjánan tuvraolmmoš ja lea bures gárvodan. Son lea sullii 1,50 mehtera stuoris ja lea Koreas eret. Sus leat čáhppes vuovttat ja badjelis leat čáhppes buvssat ja alit jáhkka, ja maiddái alit lávka.
Stuorra ohcanveahka
Lassin politiijaide, dollačáskadanvehkiide ja ambulánsii lea gohččojuvvon stuorra veahka veahkkin ohcat, nu mo Sea King gádjunhelikopter, Rukses Ruossas olbmot ja Norgga gádjunbeatnagat, Siviilasuodjalus ja maiddái gádjunfanas Gjert Wilhelmsen ja Vekteren.
Ohcan jotkojuvvo miehtá sotnabeaivvi.
Politiijat dáhttot maid veahki eaktodáhtolaččain ohcat nissona. Váldde politiijain oktavuođa dán telefonnummiris 78972000.
