Norggas ja eará OECD-riikkain gazzet eanaš nissonolbmot oahpu mas olahit bachelor- dahje mastergráda, muhto seamma guovllus leat eanemus dievddut geat váldet doavttergráda.
Norggas ja eará OECD-riikkain gazzet eanaš nissonolbmot oahpu mas olahit bachelor- dahje mastergráda, muhto seamma guovllus leat eanemus dievddut geat váldet doavttergráda.
63 proseantta sis geat Norggas olahedje bachelor- dahje mastergráda 2013/14 skuvlajagi leat nissonolbmot, čájeha OECD-rapporta Education at a Glance 2016.
Eará OECD-riikkain leat dušše Ruoŧa nissonat áŋgireappot go norgalaččat gazzat oahpuid main ožžot bachelor- dahje mastergráda, dáid studeanttaid searvvis leat 69 proseantta nissonat.
Dušše golmma riikkas ráđđejit dievddut
OECD lea 36 riikka oktasaš organisašuvdna mas riikkain lea ovdánahttin ja ekonomalaš ovttasbargu.
Ođđa guorahallan čájeha ahte dušše golmma dáin riikkain ledje eanemus dievddut geat gazze bachelor- dahje masteroahpu, nammalassii Duiskkas, Japánas ja Šveicas, čállá Statistihkalaš guovddášdoaimmahat.
58 proseantta masteroahpuin čađahit nissonat
Norggas ledje masterdásis 58 proseantta nissonat, nu lea maiddái eará OECD-riikkain.
Islánddas ja Latvias gal lei lohku vel badjelis, juohke čihččet masterbarggu čálii nissonolmmoš.
Japánas ja Turkus eai lean nissonat seamma áŋgirat čađahit masteroahpu, dušše 32 ja 43 proseantta masterstudeanttain ledje nissonolbmot.
Doavttergrádaid čađahit ges dievddut
Easka doavttergráda dásis leat eanemus dievddut geat čađahit oahpu, čájehit 2013/14 skuvlajagi logut. Nu lei sihke Norggas ja OECD-riikkain.
Gaskamearálaččat ledje 47 proseantta doavttergráda studeanttain nissonat OECD-riikkain, Norggas ges 49 proseantta.
11 OECD-riikkas ledje eanaš nissonolbmot geat maiddái gazze eanemus doavttergrádaid. Davviriikkain leat dušše Suomas eanemus nissonat geat váldet doavttergrádadásis oahpu, nammalassii 53 proseantta.
Nissonstudeanttat lassánit vel eanet
Statistihkalaš guovddášdoaimmahat lea háhkan vel ođđaset loguid.
2014/15 logut čájehit ahte maiddái Norggas leat nissonolbmot mannan dievdduid ovddabeallái doavttergrádadásis.
Oktiibuot 52 proseantta doavttergrádastudeanttain ledje nissonat.
Norgga innovašuvdna-, dutkan- ja oahppoinstituhtta dieđiha ahte vurdet vel eambbo nissoniid váldit doavttergrádaid boahtteáiggis.
