Elisabeth Edland ja Hilde Askild leaba njunnošis Álttá ja moala guvlui Finnmarksløpet-500-gilvvus.
Elisabeth Edland vulggii vuosttažin Skuvvanváris, maŋŋel go lei vuoiŋŋastan guhtta diimmu, nugo leat geatnegahtton. Son vuoddjái beanaráidduinis Skuvvanváris juste diibmu 08.01 Álttá ja moala guvlui. Skuvvanváris Áltái lea 108 kilomehtera.
Duobai
Edland vuittii diibmá bronšša. Hilde Askild gii diibmá vuittii silbba, vulggii 25 minuvtta maŋŋel Edlandda. Edland lea dál GPS-dieđuid mielde nubbin go soai leaba oalle dássálaga njunnošis.
Sudno maŋŋel čavgiiga čekkialaš Radek Havrda ja diimmá vuoiti, suopmelaš Ronny Wingren diibmu 09.27 ja 09.17 Skuvvvanváris.
Vuoiti olle njealji áigge
Diibmá ádjánedje jođáneamos 500-vuoddji gaskkal gávcci ja ovcci diimmu dán maŋemus gaskka. Jus dál vudjet seamma leahtuin, de vurdet vuosttažiid ollet mollii gaskal 16.00 ja 17.00 maŋŋelgaskabeaivvi.
Dákko oainnát man guhkin vuodjit leat:
Garra biegga
Lahttohoavda Magne Johansen, gii lea skohteriin duoddaris iskame lahtuid FL-500 gilvvus, muitala ahte lea oalle garra biegga dál duoddaris.
– Lea gal garra oarjjádat-/oarjeluládat, muhto hui buorre oainnádat, muitala son, ja lasihaste:
– Muhto dálki gal sáhttá jođánit rievdat.
Kárášjohkalaš Berit Astrid Utsi bođii Skuvvanvárrái iđđes diibmu 07.13 ja lea 24. sajis dál FL 500- gilvvus.
Jan Morten Simonsen Utsi vulggii ges Leavvajogas odne mánnodaga diibmu 8:16, ja sus lea 44. sadji FL-500 gilvvus.
