Nils Utsi oažžu fylkkakulturbálkkašumi

Finnmárkku fylkkagielda lea mearridan geiget 2016 fylkkagieldda kulturbálkkašumi neavttárii, dramatihkkarii ja bagadallái Nils Utsi. Son oažžu fylkkakulturbálkkašumi iežas máŋga jagi barggu kultureallima ovddas Finnmárkkus ja Davvi-Norggas, dieđiha Finnmárkku fylkkagielda neahttasiiddus.

1964:s álggii son Teáhterallaskuvlii Oslos.

1971:s lei Nils Utsi mielde álggaheame Hålogalándda Teáhtera. Son lei fárus buvttadeame čájálmasaid vuosttaš jagiid doppe.

1976:s čájehuvvui Ante TV-ráidu vuosttaš geardde. Dalle son šattai dovddus miehtá riikka go nevttii Ánte áhččin.

Nils Utsi lei maid guovddášrollas Ofelaš-filmmas mii lei vuosttaš sámi guhkesfilbma maid Nils Gaup gárvii 1987:s.

Ledje ollu buorit evttohasat bálkkašupmái

Lei kultuvra- ja johtolaga váldolávdegoddi mii odne almmuhii bálkkašumi deatnulažžii Nils Utsii. Politihkkariin lei váttis bargu válljet geasa geigejit bálkkašumi, go ledje ollu buorit evttohasat. Lei ovttaoaivilvuohta ahte Nils Utsi lei buorre evttohas gii lea mearkkašan hui ollu Finnmárkku teáhteriidda ja kultuvrii.

Fylkkakulturbálkkašupmi lea 30 000 ruvnno ja okta dáidda. Bálkkašupmi galgá juhkot olbmuide dahje organisašuvnnaide geat leat gullevaččat fylkii, dahje geat leat čájehan bistevaš áigumuša ja attáldaga bargat aktiivvalaččat kultuvrra ovddas.

Bálkkašupmi geigejuvvo golggotmánu 12.beaivvi eahkedis.

Ledje 12 evttohasa oažžut dán jagáš fylkkakulturbálkkašumi. Dat 12 geat ledje evttohuvvon leat:

Bryteklubben Tana (Deanu Heaibunsearvi)

Sørøyrocken

Sneblindingan – (Norgga Čalmmehemiid searvvi joavku Finnmárkkus Yukigassenis)

Seiland barnefestival (Sievjju mánáidfestivála)

Marit Hætta Øverli, Álttás eret

Kjell Johansen, Leavnnjas eret

Finn Hågen Krohg, Álttás eret

Agnete Kristin Johnsen, Unjárggas eret

Gørild Mauseth, Gilevuonas eret

Nils Utsi, Deanus eret

Rockebussen

Beaivváš Sámi Teáhter, Guovdageainnus