-Almmuhus-
OĐĐASATNiillas Holmberg «Juolge­vuođđu» ii gállán vuoito­luotta

Niillas Holmberg «Juolge­vuođđu» ii gállán vuoito­luotta

-

-

Niillas Holmberg lea guktii nammaduvvon Davviriikkaid ráđi girjjálašvuođabálkkašupmái, muhto ii fasken bálkkašumi disdateahkeda digitála bálkkašumi geigejumis.

Holmberg ii fasken Davviriikkaid girjjálašvuođabálkkašumi, muhto Suoma girječálli Monika Fagerholm, gii lea čállán romána «Vem dödade bambi?», oažžu 350 000 dánskka ruvnno ja «Guovssahas» statueahta.

– Dákkár nammádeapmi addá álo girjái lassifuomášumi ja mielddisbuktá dan, ahte girji jorgaluvvo unnimusat ovtta skandináva gillii, lohká Holmberg Ávvirii ja giittá dieđusge girjji sárguma ovddas.

– Lean giitevaš nammadeamis. Giittán maiddái Inga-Wiktoria Påve go attii girjái nu vuogas olgguldas hámi ja lassečikŋodaga olles bargui, dadjá son. 

Påve lei ge nammaduvvon goappašat sámi girjiid sárgumiid ovddas, mat ledje nammaduvvon bálkkášupmái. Karen Anne Buljo girjjis, «Guovssu guovssahas» lei maid Påve sárgon govaid.

Sámi árbevierut

Niillas Holmberg lea Ohcejogas, Suomas, eret, ja lea čállán girjji sámegillii «Juolgevuođđu» man almmuhii 2018:s. Mannan giđa ilmmai diktačoakkáldat dárogillii, ja lea maid ožžon Kirsi Kunnas bálkkašumi dán jagi Suomas, ovttas lyrihkkáriin Heli Laaksoneniin.

–  Dan namma lea «Juolgevuođđu», dárogillii «Såle»,  nu go juolggi vuođđu, danin go dat lea rupmaša lahttu mii earuha olbmo luonddus. Divttat leat sámi kultuvrra árbevieruid birra. Illustrašuvnnat leat Inga-Wiktoria Påve bokte ja girjjis lea gierdu mii čuovvu olles girjji čađa. Gierdu symbolisere ollu, nu go gierddu jurddašanvuohki áiggi birra lineára jurddašanvuogi ektui, lea Holmberg čilgen su girjji birra dalle go Ávvir čálii su birra.

Niillas Holmberg debuterii 2009:s poesiijačoakkáldagain «Dego livččen oaidnán iežan».

Guhtta jagi maŋŋel, 2015:s, lei son sámi evttohas Davviriikkaid Ráđi girjjálašvuođabálkkašupmái diktačoakkáldagain «Amas amas amasmuvvat». 

Ruhta ja statueahtta

Oktiibuot 51 čoakkáldaga, doaimmat ja dáiddára ledje  nammaduvvon Davviriikkaid ráđi viđa bálkkašupmái dán jagi. Leat sihke guhkibuš ja oanehis girjjálašvuohta, govvagirjjit ja diktačoakkáldaga, drámá, dokumentárafilbma, pop-skearru, filbmamusihkka ja symfoniija, «birøkta» ja dálkkádatdutki.

Monika Fagerholm, Jens Mattsson, Jenny Lucander, Dag Johan Haugerud, Yngve Sæther, Sampo Haapamäki ja Jens-Kjeld Jensen ledje sii geat vižže bálkkašumiid maid Davviriika ráđđi geigii disdaga digitála geigejumis. Preassagovva.
Monika Fagerholm, Jens Mattsson, Jenny Lucander, Dag Johan Haugerud, Yngve Sæther, Sampo Haapamäki ja Jens-Kjeld Jensen ledje sii geat vižže bálkkašumiid maid Davviriika ráđđi geigii disdaga digitála geigejumis. Preassagovva.

Dat viđas geat vuitet bálkkašumiid ožžot bálkkašumi mii lea «Guovssahas» statueahtta  ja 350 000 dánskka ruvnno.

Monika Fagerholm, Jens Mattsson, Jenny Lucander, Dag Johan Haugerud, Yngve Sæther, Sampo Haapamäki ja Jens-Kjeld Jensen ožžo 2020 jagi bálkkašumiid Davviriikkaid ráđis disdaga eahkedis go digitála geigen čađahuvvui.

-Almmuhus-