Sámi diktačálli ja juoigi Niillas Holmberg lea čállimin iežas vuosttaš romána. Romána «Halla Helle» almmuhuvvo suomagillii guovvamánus boahtte jagi, Suoma girjelágádusa Gummerusa bakte.
Holmberga romána «Halla Helle» láide lohkki sámekultuvrii, go váldopersovdna Samu fárre Sápmái. Romána lea servodatlaš ja das govvidit sihke luonddu ja árbevieruid gáhttema ja áigeguovdilis sámeáššiid, nu čállá Yle Sápmi. Dat lea Suoma girjelágádus Gummerus mii almmuha girjji.
Holmberg dadjá Yle Sápmái ahte lohkki ieš vásiha girjji lohkamiin dan, iige danin muital sisdoalu.
– Dat muitala ruossalasvuođaid birra sihke olbmo siste ja servošis ja dakkár nu gohčoduvvon ambivaleanssas, mii oaivvilda dan, ahte olmmoš sihke háliida juoidá ja ii hálit, muitala Holmberg Yle Sápmái.
Holmberg ii lean plánen čállit romána, muhto guokte jagi dassái son čálligođii dan:
– Guokte jagi mun lean dainna barggildan measta beaivválaččat ja in leat gal olus dan birra hállan geasage, muitala Holmberg.
