Veaike- ja nihkkelhattit lassánedje badjel logiin proseanttain dan rájes go Donald Trump vuittii presideantaválgga.
Veaike- ja nihkkelhattit lassánedje badjel logiin proseanttain dan rájes go Donald Trump vuittii presideantaválgga.
Eai leat dušše Kreml gávpogis gos moddjájit maŋŋel go Donald Trump vuittii válgga mannan vahkku. Okta máilmmi stuorámus nihkkel- ja veaikebuvttadeddjiin, Norilsk-Nickel fitnodagas, lea maid sisaboahtu lassánan maŋŋel válgga.
Disdagas bearjadahkii mannan vahkku, lassánii veaikehaddi olles 13 proseanttain London Metal Exchange márkanis, čállá The Independent Barents Observer.
Lulábealde Murmánskka, Monchegorskas, leat dát buorit ođđasat. Veaikefabrihkka buvttada sullii 60 000 tonna veaikki jahkásaččat. Maŋemus guokte jagi lea veaikehaddi njiedjan, dassážii go loktanii fas go Trump vuittii válgga.
Nihkkelhattit leat maid loktanan birrasii čiežain proseanttain beaivvi maŋŋel válgga.
Alla nihkkelhaddi buktá stuora sisaboađu Zapolyarnys, Nihkkelis ja Monchegorskas. Norilsk-Nickel lea stuorámus fitnodat mii buktá eanemus vearrosisaboađu olles guovllus, ja fitnodagas leat máŋga duháha bargi.
